პოლიტიკა

ვანო მერაბიშვილს ვადაზე ადრე გათავისუფლება 2017 წლის შემოდგომაზე ეხება - ადვოკატი

ვანო მერაბიშვილის ადვოკატმა გიორგი გელხაურმა საქართველოს შს ყოფილ მინისტრთან ე.წ. მატროსოვის ციხეში შეხვედრის შემდეგ განაცხადა, რომ მას ე.წ. „უდო“, ანუ ვადაზე ადრე გათავისუფლება 2017 წლის შემოდგომაზე ეხება.

ადვოკატის თქმით, მისთვის ჯერჯერობით უცნობია, განიხილავს თუ არა „უდოს“ საკითხს სასჯელაღსრულების სამინისტროს სპეციალური კომისია.

„როდესაც “უდო” ეხება ნებისმიერ პატიმარს, ამ საკითხს სასჯელაღსრულების სამინისტროს სპეციალური კომისია იხილავს. აქედან გამომდინარე, მე როგორც ადვოკატი, მივმართავ თუ არა, ამას არ აქვს მნიშვნელობა, თვითონ კომისია განიხილავს, შეეხება თუ არა ვანო მერაბიშვილს ვადაზე ადრე გათავისუფლება. როგორც ჩემთვის არის ცნობილი, ვანო მერაბიშვილს ვადაზე ადრე გათავისუფლება 2017 წლის შემოდგომაზე ეხება. აქედან გამომდინარე, არ ვიცი, კომისია რას საქმიანობს“, – აცხადებს ადვოკატი გიორგი გელხაური.

შეგახსენებთ, რომ დღეს ტელეკომპანია „იბერიის“ ცნობით, ვანო მერაბიშვილი შეიძლება ვადაზე ადრე, კერძოდ, 20 თებერვალს, გაათავისუფლონ. არხთან საუბრისას „ქართული ოცნების “ წარმომადგენლები ამ ფაქტს უარყოფენ, მაგრამ ფრაქცია „ევროპულ საქართველოში“ ფიქრობენ, რომ ბრძოლა ღირს და ამას “უგულავას მაგალითიც“ ადასტურებს.

ანა მებურიშვილი