პოლიტიკა

ვალდებულება გვაქვს, თანხები იყოს რაციონალურად მიმართული - ლევან იზორია

ყველა რეფორმა, რომელსაც ჩვენ განვახორციელებთ უწყებაში, მიმართული იქნება ჩვენი თავდაცვისუნარიანობის გაზრდისკენ, - განუცხადა ჟურნალისტებს საქართველოს თავდაცვის მინისტრმა, ლევან იზორიამ იმ კითხვის საპასუხოდ, იგეგმება თუ არა თავდაცვის უწყებაში თანამშრომლების შემცირება და მცირდება თუ არა სამინისტროს ხარჯები.

როგორც იზორიამ აღნიშნა, ამ ეტაპზე იმისთვის, რომ ეს მზადყოფნა გაიზარდოს, აუცილებელია გარკვეული ოპტიმიზაცია.

”ბუნებრივია, ჩვენ გადამხდელების წინაშე, მოსახლეობის წინაშე, ვინც თავდაცვის თუ სხვა სფეროს აფინანსებს, ერთგვარი პასუხისმგებლობა და ვალდებულება გვაქვს, რომ თანხები იყოს რაციონალურად მიმართული, რათა ქვეყანას შეეძლოს თავისი თავის დაცვა, ქვეყანას შეეძლოს მოსახლეობის დაცვა. ამ ეტაპზე, იმისთვის, რომ სწორედ ეს მზადყოფნა გაიზარდოს, ჩვენ ვთვლით, რომ აუცილებელია გარკვეული ოპტიმიზაცია და აქ საქართველო არ იქნება გამონაკლისი. ასეთი ნაბიჯები მთელმა რიგმა ქვეყნებმა გადადგეს, როდესაც გადაწყვიტეს მათი საბრძოლო მზადყოფნის ამაღლება. ზუსტად იგივე გზავნილები მოვისმინე ნატო-ს გენერალური მდივნისგან; როდესაც ნორვეგიაშიც დადგა დღის წესრიგში საბრძოლო მზადყოფნის ამაღლება, მათაც მოუწიათ გარკვეული ოპტიმიზაციისკენ ნაბიჯების გადადგმა. ამიტომ, ყველა რეფორმა, რომელსაც ჩვენ ვახორციელებთ ჩვენს სტრატეგიულ პარტიორთან, აშშ-სთან ერთად, მიმართულია ჩვენი ეროვნული ინტერესებისკენ. ჩვენს ეროვნულ ინტერესშია ის, რომ თანხები, რომელიც თავდაცვის სისტემისთვის არის გათვალისწინებული, იყოს ჩვენი ხალხის, ჩვენი ეროვნული ინტერესების დასაცავად”, - განაცხადა იზორიამ.

ნინო ექვთიმიშვილი