პოლიტიკა

უვიზო რეჟიმის შემდეგ, ლოგიკურია ევროკავშირში გაწევრიანების მიზნით განაცხადის გაკეთება - ანდრეს მამიკინსი

უვიზო რეჟიმის შემდეგ, ლოგიკურია ევროკავშირში გაწევრიანების მიზნით განაცხადის გაკეთება, - განაცხადა ევროპარლამენტარმა ანდრეს მამიკინსმა ,,პირველ არხთან“ ექსკლუზიურ ინტერვიუში.

მისი თქმით, ევროკავშირის იდეა გაფართოებას ეფუძნება და როგორც ევროდეპუტატი ამბობს, „გეოგრაფიული თვალსაზრისით, საქართველო ევროპაა და მისი ადგილი ევროკავშირშია“.

„წლიდან თურქეთი ასოცირებული სახელმწიფოა, 1999 წლიდან კი კანდიდატი. დღეს იუნკერმა განაცხადა, რომ თურქეთის გაწევრიანების თაობაზე მოლაპარაკებების გაგრძელება რეალური არ არის. მაგალითად შეიძლება დავასახელოთ ნორვეგია და შვეიცარია. ისინი ევროპის ეკონომიკური სივრცის ნაწილს წარმოადგენენ. შვეიცარია არ ითხოვს წევრობას.

მაგალითია მონაკოც, სადაც ევროა მიმოქცევაში. ვფიქრობ, რომ ევროპარლამენტის წევრები უფრო გამბედავები უნდა ვიყოთ.

ევროკავშირის იდეა გაფართოებას ეფუძნება. გეოგრაფიული თვალსაზრისით, საქართველო ევროპაა და მისი ადგილი ევროკავშირშია.

თქვენ შეგიძლიათ და გაქვთ ყველა შესაძლებლობა იმისათვის, რომ არაოფიციალურად გაწევრიანების თაობაზე მოლაპარაკებები დაიწყოთ. საქართველოს აქვს ასოცირების შეთანხმებაც და წევრობის შესახებ, არაოფიციალურად პოლიტიკური დიალოგის დაწყებით, მომავლისთვის ნიადაგს მოამზადებთ.

თუ ევროკომისიის პრეზიდენტი დასავლეთ ბალკანეთის ქვეყნების მომავალს ევროკავშირში ხედავს, რატომ არა საქართველოც?! საქართველო ეკუთვნის ევროპას, ევროპულ კულტურას, ევროპულ კონტინენტს. კიდევ ერთხელ ვამბობ, რომ ეს მხოლოდ პოლიტიკურ ნებაზეა დამოკიდებული.

ვფიქრობ, რომ არაოფიციალურ დონეზე, არაჩვეულებრივმა ქართველმა დიპლომატებმა უნდა გააგრძელონ მუშაობა ევროპულ სტრუქტურებთან, კომისიასთან, პარლამენტთან, საბჭოსთან როგორც ელმარ ბროკმა განაცხადა, შედეგის მისაღწევად უნდა ვისაუბროთ, ვისაუბროთ და ვისაუბროთ”,- განაცხადა ევროპარლამენტარმა.