პოლიტიკა

უპრეცედენტო პოლიტიკური დისკრიმინაციაა, როდესაც დაფინანსების ყოველგვარი პერსპექტივა გამოირიცხა-შალვა ნათელაშვილი

ოპოზიციური პარტიები შექმნილი წინასაარჩევნო გარემოს გამო შეშფოთებას გამოთქვამენ.

პარტიების ლიდერების თქმით, წინასაარჩევნო გარემო არასამართლიანი და დისკრიმინაციულია და ვერ უზრუნველყოფს სამართლიან კონკურენტულ გარემოში არჩევნების ჩატარებას.

როგორც „ლეიბორისტული პარტიის“ ლიდერმა შალვა ნათელაშვილმა აღნიშნა, წინასაარჩევნოდ ოპოზიიცის მიმართ „უპრეცედენტო პოლიტიკური დისკრიმინაციაა, როდესაც დაფინანსების ყოველგვარი პერსპექტივა გამოირიცხა“.

„იმ ფონზე, როდესაც მილიარდერების სექტა იბრძვის ძალაუფლების გასახანგრძლივებლად, პოლიტიკური პარტიებს არ გააჩნიათ იმის თანხებიც კი,რომ ელემენტარულად თბილისის გარეთ გადავაადგილდეთ. მარტო ეს მომენტი გამორიცხავს ამ არჩევნების თანასწორობისა, სამართლიანობის და ლეგიტიმურობის თაობაზე ნებისმიერი დასკვნის გაკეთებას“,-განაცხადა შალვა ნათელაშვილმა.

„ახალი მემარჯვენეების“ლიდერის მამუკა კაციტაძის თქმით კი, საერთო ფინანსების 90% მიდის მმართველი გუნდის ყულაბაში.

„მერე როდესაც საუბარია, შედეგი რატომ არ დაიდოო? რანაირად უნდა დაიდოს შედეგი? ყველა კოპმპონენტი, რომელიც არჩევნებზე გავლენას ახდენს, არის მონოპოლიზირებული და უზურპირებული მმართველი პარტიის მიერ“,-აღნიშნა კაციტაძემ.

მონიკა დავლიანიძე