პოლიტიკა

უნდა გავაკეთოთ ისე, რომ ძალოვანმა უწყებებმა აღარ დააშანტაჟონ ადამიანები მარიხუანის გამო - გია ვოლსკი

პარლამენტის ვიცე-სპიკერის, გია ვოლსკის განცხადებით, უმრავლესობა მუშაობს ნარკოპოლიტიკის რეფორმაზე. მისი თქმით, მმართველი გუნდი საკონსტიტუციო სასამართლოს გადაწყვეტილებას აუცილებლად შეასრულებს, რომელიც გულისხმობს მარიხუანის შესახებ კანონში ცვლილებების შეტანას.

„საზოგადოებამ უნდა გაიგოს მყარად და მკაფიოდ - უმრავლესობას გვაქვს აზრი, რომ საკონსტიტუციო სასამართლოს გადაწყვეტილება უნდა შესრულდეს, მაგრამ ამპლიტუდა მიდგომების განსხვავდება დეპუტატებს შორის. ამიტომ, ველოდებით ახალ პაკეტს, რომელიც ჩამოაყალიბებს ახალ მიდგომებს სახელმწიფოში. ნურავის ექნება ილუზია, ამ კანონს მივიღებთ და ლიბერალიზაციის ისეთი ხარისხი შემოვა, რომ პასუხი არავის მოეთხოვება. არსებობს საჯარიმო სანქციები, სისხლის სამართლის პასუხისმგებლობა. პაკეტი, რომელიც მზადდება, ითვალისწინებს საკმაოდ სერიოზულ შეზღუდვებს, მათთვის ვინც არის დამოკიდებული მარიხუანაზე“, - განაცხადა ვოლსკიმ.

დეპუტატის თქმით, პრევენციული ზომებია მისაღები, რათა პოლიციელებმა აღარ დააშანტაჟონ მოქალაქეები ნარკოტიკის მოხმარების გამო.

„უნდა გავაკეთოთ ისე, რომ ძალოვან უწყებებს არ ჰქონდეთ ცდუნება, რომ ამით დააშანტაჟონ და მოახდინონ ზეწოლა ადამიანებზე“, - განაცხადა ვოლსკიმ.

შეგახსენებთ, დღეს პარლამენტში პირველი მოსმენით განიხილავენ „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ“ მთავრობის მიერ ინიცირებული კანონპროექტს.

ანა მებურიშვილი