პოლიტიკა

უნდა დავრწმუნდეთ პარლამენტში, რომ ეს სწორედ ამ მიზნებისთვის არის, წინააღმდეგ შემთხვევაში, მხარს არ დავუჭერთ - აკაკი ზოიძე კანაფის კულტივაციაზე

ჯანდაცვის საპარლამენტო კომიტეტის თავმჯდომარის, აკაკი ზოიძის განცხადებით, მარიხუანას, როგორც ნებისმიერი ნარკოტიკული ნივთიერების უკანონო ბრუნვა, კულტივირება თუ რეალიზაცია დასჯადი რჩება.

დეპუტატმა აღნიშნა, რომ გასაღების საკითხზე სახელმწიფოს ძალიან მკაცრი მიდგომა ექნება. რაც შეეხება ნარკოდამოკიდებულ ადამიანებს, ზოიძის აზრით, სახელმწფოს უფრო ლიბერალური მიდგომა უნდა ჰქონდეს.

„რაც შეეხება დეკრიმინალიზაციას, დიდი ხანია მომხრე ვარ, რომ ადამიანები მარიხუანას ან ნებისმიერი ნარკოტიკის მოხმარების გამო საპატიმროში არ უნდა გავუშვათ. თუ მათ აქვთ ნარკოდამოკიდებულება უნდა ვუმკურნალოთ. თუ ნარკოდამოკიდებულების გზაზე დგანან, უნდა დავეხმაროთ, დაბრუნდნენ საზოგადოებაში“, – განაცხადა მან.

ამასთან, მისი თქმით, სამედიცინო მიზნით წარმოება არც გაერო-ს და არც სხვა კონვენციით აკრძალული არ არის.

ზოიძის თქმით, საჭიროა იმაში დარწმუნება, რომ საქართველოში კანაფის მოყვანა-წარმოება სამედიცინო მიზნებისთვის მოხდება.

„უნდა დავრწმუნდეთ პარლამენტში, რომ ეს სწორედ ამ მიზნებისთვის არის, წინააღმდეგ შემთხვევაში, მხარს არ დავუჭერთ“, – განაცხადა ზოიძემ.