პოლიტიკა

უმრავლესობა უნდა იყოს პასუხისმგებელი იმ პროცესებზე, რასაც გამოიწვევს კანონი ე.წ. ფარული მოსმენების შესახებ - გიგა ბოკერია

საპარლამენტო უმცირესობის წევრის, გიგა ბოკერიას თქმით, „ქართული ოცნების“ მიერ შემუშავებული ე.წ. ფარული მოსმენების კანონი არ არის მიმართული ქვეყნის უსაფრთხოების დაცვისკენ.

საპარლამენტო ფრაქცია „ევროპული საქართველოს“ წევრის განცხადებით, პრეზიდენტის ვეტოს უმრავლესობა ადვილად დაძლევს.

„არავის აქვს ილუზია, რომ კანონპროექტს მიიღებენ და შემდეგ პრეზიდენტის ვეტოს შემთხვევაში მისი დაძლევა გაუჭირდებათ, ვინაიდან მათ საკონსტიტუციო უმრავლესობა აქვთ. მთელმა საზოგადოებამ უნდა იცოდეს და იმათაც [უმრავლესობამ] უნდა იცოდნენ, რომ ისინი იღებენ პასუხისმგებლობას ყველა იმ სიბინძურესა და კანონდარღვევაზე, რომელიც გაგრძელდება ამ ქვეყანაში ივანიშვილის ხელისუფლების ქვეშ . ეს [ ე.წ. ფარული მოსმენების კანონი] არაა მიმართული ქვეყნის უსაფრთხოების დაცვისკენ, როგორც მათ სურთ ამის წარმოდგენა. ეს დისკუსია არანაირ კავშირში არაა უსაფრთხოებასთან, ეს არის სიცრუე“, - განაცხადა ბოკერიამ.

შეგახსენებთ, რომ გუშინ პარლამენტის პლენარულ სხდომაზე მეორე მოსმენით მიიღეს საკონსტიტუციო ცვლილებათა პაკეტი ე.წ. ფარულ საგამოძიებო მოქმედებებთან დაკავშირებით.

როგორც საპარლამენტო ფრაქცია „ქართული ოცნების“ თავმჯდომარემ , მამუკა მდინარაძემ განაცხადა, კანონში ცვლილებები შევიდა. კერძოდ, სუს-ის უფროსი აღარ დანიშნავს ფარული მოსმენების განმახორციელებელი სააგენტოს უფროსის მოადგილეებს და აღარ დაამტკიცებს ამ უწყების დებულებას. პრემიერი უკვე კომისიის წარდგინებით დანიშნავს სააგენტოს ხელმძღვანელს.

რაც შეეხება ოპოზიციას, მისი თქმით, ეს ცვლილებები უმნიშვნელოა და კანონის ზოგად არსს არ ცვლის.

ანა მებურიშვილი