პოლიტიკა

უმრავლესობა მზადაა გადავიდეს პროპორციულ საარჩევნო სისტემაზე- გიორგი ახვლედიანი

პარტია „გაერთიანებული დემოკრატების“ წევრის, გიორგი ახვლედიანის განცხადებით, უმრავლესობა მხოლოდ მაშინ დაუჭერს მხარს პროპორციულ სისტემაზე სრულად გადასვლას, თუ გადაუნაწილებელი მანდატები მხოლოდ პირველ ადგილზე გასულ პარტიას ერგება.

ამჟამინდელი სისტემით მანდატები პარლამენტში მოხვედრილ პარტიებს შორის ნაწილდება.

„ისინი [უმრავლესობა] მზად იქნებიან, პროპორციულ სისტემაზე გადასვლას დაუჭირონ მხარი მხოლოდ იმ შემთხვევაში, თუ ყველა გადაუნაწილებელი მანდატი, რომელიც დღეს ყველა ბარიერგადალახულ პარტიაზე ნაწილდება, მიეკუთვნება მხოლოდ პირველ ადგილზე გასულ პარტიას“, - განაცხადა ახვლედიანმა.

უმრავლესობის ინიციატივას არ ეთანხმება „ერთიანი ნაციონალური მოძრაობის“ წევრი ხათუნა გოგორიშვილი.

„48% მიიღო „ქართულმა ოცნებამ“ არჩევნებზე, და აიღო მანდატების 78%. თუ ეს სისტემა იმუშავებს, გამოვა, რომ 48%-ის შემთხვევაში ისინი მიიღებენ 73%-ს. ასე რომ, განსხვავება არის, რა თქმა უნდა, როგორც ბატონმა ირაკლიმ [კობახიძემ] თქვა, მაგრამ არა ისეთი, რომ როგორც პოლიტიკური შეთანახმება და კონსესუსი განვიხილოთ“, - განაცხადა გოგორიშვილმა.

შეგახსენებთ, რომ დღეს მიმდინარეობს სახელმწიფო საკონსტიტუციო კომისიის გაერთიანებული სხდომა, სადაც მაჟორიტარული საარჩევნო სისტემის სავარაუდო გაუქმების გარდა მსჯელობენ საპარლამენტო რესპუბლიკის მოდელზე გადასვლასა და პარლამენტის ადგილმდებარეობის შესაძლო შეცვლის შესახებ.

ანა მებურიშვილი