პოლიტიკა

უმჯობესია, თუკი არჩილ ტატუნაშვილის საქმეზე ერთიან რეზოლუციას მიიღებს პარლამენტი - ეკა ბესელია

იურიდიულ საკითხთა კომიტეტის თავმჯდომარის, ეკა ბესელიას შეფასებით, უმჯობესია, პარლამენტმა არჩილ ტატუნაშვილის დაღუპვის საქმეზე ერთიანი რეზოლუცია მიიღოს, რომელშიც იქნება მთლიანი ხედვა წარმოდგენილი.

„ეს არის ძალიან დიდი ტრაგედია და ბოლო პერიოდის მოვლენებს თუ გავიხსენებთ უმძიმესი მოვლენა. ახლა ყველა მოლოდინის რეჟიმში ვართ. ბოლო ინფორმაცია ყველაზე უფრო საიმედო იყო და ველოდებით, რომ საბოლოოდ მალე გადაწყდება გადმოსვენების საკითხი, რომ ოჯახს მიეცეს დატირების საშუალება. რაც შეეხება შემდგომ ქმედებებს, დღეს პარლამენტში დაგეგმილია რეზოლუციების განხილვა. ალბათ, უკეთესი იქნება, თუკი ერთიანი დოკუმენტი იქნება. ჩვენს მიერ მომზადებულ დოკუმენტში, რომელიც უმრავლესობამ წარმოადგინა, ძალიან მკაცრი შეფასებები და ფართო ხედვაა, ამ ძალიან მძიმე შემთხვევის გამო საერთაშორისო საზოგადოების ჩართულობის, მობილიზებისა და რეაგირების. მე მგონი, ეს დოკუმენტი მხარდაჭერილი უნდა იყოს ყველა ძალის მიერ. ვფიქრობ, ერთ დოკუმენტში შეიძლება გაერთიანდეს მთლიანი ხედვა. ჩვენთვის მთავარია დოკუმენტს ჰქონდეს არა მხოლოდ შეფასების შინაარსი, არამედ ჰქონდეს მკვეთრი ეფექტი და საერთაშორისო საზოგადოების კონსოლიდირების შინაარსიც. დოკუმენტი კარგადაა მომზადებული და თუ საჭიროა რაიმეს დამატება, ამისთვისაც მზად ვართ",- თქვა ბესელიამ.

ცნობისთვის, როგორც საპარლამენტო უმრავლესობამ, ასევე უმცირესობამ წარმოადგინეს თავიანთი რეზოლუციები არჩილ ტატუნაშვილის საქმეზე.