პოლიტიკა

უკრაინულმა მხარემ მიხეილ სააკაშვილის მიმართ სამართლებრივი პროცედურები განაახლა - თეა წულუკიანი

იუსტიციის მინისტრის, თეა წულუკიანის ინფორმაციით, უკრაინულმა მხარემ დააზუსტა, რჩებოდა თუ არა ძალაში საქართველოს 2014-2015 წლების მოთხოვნა მიხეილ სააკაშვილის ექსტრადირების შესახებ, რაზეც დადებითი პასუხი მიიღო. შესაბამისად საქართველოს ყოფილი პრეზიდენტისა და ოდესის ყოფილი გუბერნატორის მიმართ სამართლებრივი პროცედურები განახლდა.

„ჩვენ უკრაინულმა მხარემ მოგვმართა წერილით, სადაც დასვა შეკითხვა, 2014-15 წლების ექსტრადირების მოთხოვნები, რომლებიც მათ მიიღეს თავის დროზე, იყო თუ არა დღესაც ძალაში, რაზეც პასუხი მიიღო პროკურატურისგან, რომ დიახ, ის მოთხოვნები დღესაც ძალაშია. კიდევ ერთხელ, თავის დაზღვევის მიზნით გადაეგზავნა იგივე დოკუმენტები, რაც ადრე იყო გაგზავნილი.

შესაბამისად, მორიგ ჯერზე უკრაინულ მხარეს აქვს მოთხოვნა განახლებული, იგივე დოკუმენტაცია და რამდენადაც ჩემთვის ცნობილია, გუშინდელი და გუშინწინდელი კომუნიკაციიდან ჩვენს უკრაინელ კოლეგებთან, იქ მიმდინარეობს სამართლებრივი პროცედურები, განახლებული პროცედურები, როგორც მათ დაარქვეს, რაკი ჩვენგან შეიტყვეს, რომ ინტერესი და სამართლებრივი მოთხოვნა საქართველოს მხრიდან კვლავ ძალაშია“, - განაცხადა იუსტიციის მინისტრმა.

ანა მებურიშვილი