პოლიტიკა

უკრაინისა და საქართველოს მოქალაქეებისათვის უვიზო რეჟიმის უზრუნველყოფის შესაძლებლობა „სატყუარაა“ - ლეონიდ კალაშნიკოვი

ევროკავშირის მიერ უკრაინისა და საქართველოს მოქალაქეებისათვის უვიზო რეჟიმის უზრუნველყოფის შესაძლებლობა „სატყუარაა“, რომელიც უშუალოდ ხალხის ცხოვრებას არ გააუმჯობესებს და არ გადაჭრის მათ არსებით პრობლემებს, - განაცხადა რუსეთის სახელმწიფო დუმის დსთ-ს კომიტეტის ხელმძღვანელმა ლეონიდ კალაშნიკოვმა რუსულ სააგენტო „რია ნოვოსტისთან“ ინტერვიუში.

„მათ მისცემენ უვიზო რეჟიმს, მაგრამ სამუშაოს მიღების და სხვა უფლებების გარეშე. ეს ასეთი სატყუარაა, რომელიც არაფერს წყვეტს მათთვის, ვინც ბინის, განათლების გადასახადი უნდა გადაიხადოს“, - აცხადებს ლეონიდ კალაშნიკოვი.

მან მოლდოვას შესაბამისი გამოცდილებაც გაიხსენა, რომლის მოქალაქეებთანაც ევროკავშირმა მანამდე დაამყარა უვიზო რეჟიმი.

„შეხედეთ მოლდოვას და მის გამოცდილებას. მათ ასევე მისცეს უვიზო რეჟიმი, მაგრამ ამაში ხომ არ არის სახელმწიფოს ცხოვრების აზრი. მისცემენ მათ უვიზო რეჟიმს, მაგრამ ნუთუ ეს რამეს იძლევა? რა თქმა უნდა, არა. მით უმეტეს, ეს ტურისტული ვიზებია, რომელიც უკვე დიდი ხანია, ბევრ ქვეყნებს აქვთ, მაგრამ ეს ვიზები არ იძლევა მუშაობის უფლებას“, - აღნიშნა კალაშნიკოვმა.

ნინო ექვთიმიშვილი