სამართალი

უკრაინის პოლიციამ ქართველი კრიმინალური ავტორიტეტი რამაზ ციკორიძე დააკავა

უკრაინის პოლიციამ კიევის ოლქში ქართველი კრიმინალური ავტორიტეტი რამაზ ციკორიძე, ზედმეტსახელად „რამაზ ბაღდატსკი“ დააკავა. ინფორმაცია ამის შესახებ კიევის პოლიციის ვებგვერდზე გამოქვეყნდა.

როგორც განცხადებაშია აღნიშნული, 45 წლის ე.წ. კანონიერი ქურდი კიევში 2011 წელს ჩავიდა. რამაზ ციკორიძე საქართველოსა და უკრაინაში არაერთხელაა ნასამართლევი. ბოლო შვიდი წლის განმავლობაში ის სამართლამდამცველებმა არაერთხელ დააკავეს და უკრაინიდან გააძევეს, რის შემდეგაც ის ქვეყანაში ყალბი საბუთებით ბრუნდებოდა.

ვინაიდან ციკორიძეს მოქალაქეობა არ გააჩნია, ის უცხოელების დროებითი მიღების ჩერნიგოვის პუნქტში გადაიყვანეს.

როგორც ცნობილია, რამაზ ციკორიძის უკრაინიდან გაძევების საკითხი მისი პირადი მონაცემების ოფიციალურად დადგენის შემდეგ გადაწყდება.

რამაზ ციკორიძეს სხვადასხვა დროს ბრალი ედებოდა ისეთი საქმიანობებისთვის, როგორიცაა ბინების ძარცვასა და მანქანების გატაცებასთან დაკავშირებულ კრიმინალურ დაჯგუფებების კონტროლი, ქურდობა, დოკუმენტების გაყალბება თუ ნარკოტიკების უკანონო შენახვა.