პოლიტიკა

უკრაინის პარლამენტთან მეგობრობის ჯგუფი კიევში გაემგზავრა

საქართველოს საპარლამენტო დელეგაცია, კერძოდ, უკრაინის პარლამენტთან მეგობრობის ჯგუფი კიევში გაემგზავრა.

ვიზიტის ფარგლებში დაგეგმილია, რომ 8 ნოემბერს ჯგუფის წევრები ანტიტერორისტული ოპერაციის ზონას მოინახულებენ, 9-10 ნოემბერს კი გაიმართება შეხვედრები უმაღლესი რადის თავმჯდომარესთან, ანდრი პარუბისთან, საგარეო ურთიერთობათა კომიტეტის წევრებთან და მუდმივმოქმედი დელეგაციების ხელმძღვანელებთან, უკრაინის ვიცე-პრემიერთან ევროინტეგრაციის საკითხებში, ივანა კლიმპუშ-ცინცაძესთან, აგრეთვე უკრაინის პარლამენტში საქართველოსთან მეგობრობის ჯგუფის წევრებთან და დიასპორის წარმომადგენლებთან.

დელეგაციის წევრმა და მეგობრობის ჯგუფის ვიცესპიკერმა სერგი კაპანაძემ ხაზი გაუსვა უკრაინასთან დიპლომატიური ურთიერთობების მნიშვნელობას.

„მთავარი ამ შეხვედრებში იქნება ის, რომ ჩვენ გავემგზავრებით დონეცკის რაიონში, სადაც ანტიტერორისტული ოპერაციის ზონას მოვინახულებთ, ზოგადად, ჩვენი პოლიტიკური ძალისთვის მნიშვნელოვანია უკრაინასთან სტრატეგიული ურთიერთობების ხაზგასმა, როგორც სიტყვებით, ისე ქმედებებით“, - განაცხადა მეგობრობის ჯგუფის ვიცესპიკერმა.

კაპანაძის გარდა დელეგაციაში ასევე შედიან ჯგუფის ხელმძღვანელი გიორგი მოსიძე, პარლამენტარები კახა კუჭავა, დავით მათიკაშვილი, ირინა ფრუიძე, გელა სამხარაული და გოგი მეშველიანი.