სამართალი

უკრაინის კონსტიტუციით მათი მოქალაქის უცხო ქვეყანაში ექსტრადირება არ შეიძლება - ირაკლი შოთაძე

მიხეილ სააკაშვილის საქართველოში ექსტრადირების შემაფერხებელი გარემოება სამართლებრივად, უკრაინის კონსტიტუციაა. მათი მოქალაქის უცხო ქვეყანაში ექსტრადირება არ შეიძლება, - განუცხადა ჟურნალისტებს საქართველოს მთავარმა პროკურორმა, ირაკლი შოთაძემ.

მისი თქმით, ექსპრეზიდენტის ექსტრადაციის მოთხოვნით საქართველოს უკრაინას ორჯერ მიმართა, რაზეც უარი მიიღო.

„ჩვენ ორჯერ გვაქვს გაგზავნილი ექსტრადირების მოთხოვნა უკრაინაში, რაზეც უარი გვაქვს მიღებული, ეს მოთხოვნები გაგზავნილია, ჩვენ ვთანაშრომლობთ ჩვენს კოლეგებთან უკრაინაში. დღესდღეობით სააკაშვილის ექსტრადირების შემაფერხებელი გარემოება საქართველოში სამართლებრივად არის კონსტიტუცია. მათი მოქალაქის უცხო ქვეყანაში ექსტრადირება არ შეიძლება. ჩვენ ვაგრძელებთ მუშაობას. ჩვენ ამ საკითხზე მიმართული გვაქვს უკრაინისთვის. მოთხოვნა გაგზავნილია. სამართლებრივი რეაგირება რაც უნდა მოგვეხდინა, მოვახდინეთ“, - განაცხადა ირაკლი შოთაძემ.

ცნობისათვის, საქართველოში ვიზიტით მყოფმა უკრაინის პრეზიდენტმა, პეტრო პოროშენკომ გუშინ განაცხადა, რომ მიხეილ სააკაშვილის ექსტრადირების შესახებ საქართველოს ხელისუფლებისგან მოთხოვნა არ მიუღია და ამიტომ, ეს საკითხი არ განხილულა.

ნინო ექვთიმიშვილი