პოლიტიკა

უკრაინაში განწყობილნი არიან, რომ საქართველოს არ ჩამორჩნენ ვიზალიბერალიზაციის კუთხით - გიორგი მოსიძე

საპარლამენტო ფრაქცია „ქართული ოცნების“ წევრმა გიორგი მოსიძემ კიევში პრემიერ-მინისტრის ვიზიტი შეაფასა. მოსიძის თქმით, უკრაინელები ვარაუდობენ, რომ წლის ბოლომდე მათ ექნებათ საშუალება, უვიზოდ იმოგზაურონ შენგენის ზონის ქვეყნებში.

„მე ვახლდი პრემიერ-მინისტრს კიევში ვიზიტზე და შემიძლია დაგიდასტუროთ, რომ მთელი უკრაინა არის განწყობილი, რომ არ ჩამოგვრჩეს და მათაც დიდი იმედი აქვთ, რომ გარკვეული პერიოდის მერე შემოგვიერთდებიან და სადღაც ზაფხულიდან ან წლის ბოლომდე მათაც ექნებათ შენგენის ზონაში უვიზო მიმოსვლის საშუალება“, - განაცხადა მოსიძემ „ტვ პირველის“ ეთერში.

მოსიძემ ასევე ის მიზეზები დაასახელა, თუ რატომ მიიღო საქართველომ უკრაინაზე ადრე ვიზალიბერალიზაცია.

„ჩვენ გარკვეულწილად დავასწარით უკრაინას. ამით ხაზგასმა მოხდა ევროკავშირის მხრიდან, რომ რეფორმებით, ასოცირების ხელშეკრულების შესრულებითა და სხვა პროცესებით, რომლებშიც ვართ ჩართულნი, ჩვენ უკრაინას ცოტათი ვუსწრებთ, ანუ წინ ვართ. შესაბამისად, ჩვენ უფრო ადრე მივიღეთ ვიზალიბერალიზაცია, თუმცა უკრაინაც ყველანაირად ეცდება, რომ როგორც უფრო დიდი და ტლანქი ქვეყანა, იქ რეფორმების გატარებაც უფრო რთულია, შეეცდება, რომ მალე შემოგვიერთდეს“, - განაცხადა მოსიძემ.

ანა მებურიშვილი