პოლიტიკა

უკეთესი იქნება, თუკი პერმანენტული სადამკვირვებლო მისია განთავსდება ოკუპირებულ ტერიტორიებზე - ევროსაბჭოს გენერალური მდივანი

ევროსაბჭოს გენერალური მდივანი ტორნბიორნ იაგლანდი საქართველოს საგარეო საქმეთა მინისტრთან მიხეილ ჯანელიძესთან ერთობლივი პრესკონფერენცია გამართა.

იაგლანდმა ისაუბრა საქართველოს ოკუპირებულ ტერიტორიებზე მუდმივი სადამკვირვებლო მისიის არსებობის აუცილებლობაზე.

„ძალიან მნიშვნელოვანია ჩვენთვის, რომ ადგილზე ვიყოთ წარმოდგენილები და ისე გავავრცელოთ ცნობები, თუ რა ხდება. წელიწადში ორჯერ პირადად მე ვამზადებ ანგარიშს. უკეთესი იქნება, თუ ჩვენ შევძლებთ პერმანენტული სადამკვირვებლო მისიის განთავსებას ადგილზე, რომ გვქონდეს უფრო ზუსტი ინფორმაცია. ყველა წევრი ქვეყნისთვის მნიშვნელოვანია, რომ წვდომა გვქონდეს ამ ტერიტორიაზე, საკუთარი თვალით ვნახოთ ყველაფერი,“- განაცხადა იაგლანდმა.

მიხეილ ჯანელიძის განცხადებით, მან გააცნო ევროსაბჭოს გენერალურ მდივანს ოკუპირებულ ტერიტორიებზე ადამიანთა უფლებების დაცვის კუთხით შექმნილი სიტუაცია.

იაგლანდმა ასევე აღნიშნა, რომ მოხარულია საქართველოს მიერ მიღწეული პროგრესით. მან დაამატა, რომ ევროსაბჭო მზადაა, დაეხმაროს საქართველოს სასამართლო რეფორმის განხორციელებაში.

„მინდა, მივულოცო საქართველოს ის პროგრესი, რომელსაც ბოლო წლების განმავლობაში მიაღწია. ევროპა მხარს უჭერს საქართველოში რეფორმების პროცესს, როგორც ეს სამოქმედო გეგმაშია გაწერილი. ფოკუსირებული ვართ, რომ საუკეთესო როლი შევასრულოთ სასამართლოს რეფორმის პროცესში. ამ თვალსაზრისით ძალიან მნიშვნელოვანია საკონსტიტუციო ცვლილების პროცესი და მოხარული ვარ, რომ საქართველოს მთავრობასა და პარლამენტს სურს, მჭიდროდ იმუშაოს ვენეციის კომისიასთან, რომელიც არის საპატივსაცემო ორგანო მთელ მსოფლიოში,“- თქვა ევროსაბჭოს გენმდივანმა.

პრესკონფერენციაზე იაგლანდმა ასევე ისაუბრა მედიაპლურალიზმსა და მაუწყებლობის შესახებ კანონზე.

დღეს ტორბიორნ იაგლანდს დაგეგმილი აქვს შეხვედრები საქართველოს პრეზიდენტთან და პრემიერ-მინისტრთან.

ანა მებურიშვილი