სამართალი

უჩა ნანუაშვილისთვის ბოდიშის მოხდას არ ვაპირებ- თეა წულუკიანი

საქართველოს იუსტიციის მინისტრი თეა წულუკიანი სახალხო დამცველ უჩა ნანუაშვილისთვის ბოდიშის მოხდას არ აპირებს.

როგორც წულუკიანმა საკითხის კომენტირებისას განმარტა, ის ბოდიშს არ უხდის ადამიანებს, რომლებიც საზღვარგარეთ საქართველოს წარუმატებლობისთვის მუშაობენ.

„მე არ ვუხდი და ქართველები არ უხდიან ბოდიშს იმ ქართველებს, რომლებიც საქართველოს წარუმატებლობისთვის მუშაობენ საზღვარგარეთ. ბატონ უჩას ქალბატონმა ანა ნაცვლიშვილმა გასცა პასუხი, როდესაც მან დაადასტურა, რომ სამივენი - ხატიაშვილიც, ომბუდსმენიც და თავად „საია“ მუშაობდნენ ამ სიის საწინააღმდეგოდ სტრასბურგში. ამიტომ, აქ საბოდიშოც არაფერია, პირიქით, მას მოუწევს საქართველოს მოსახლეობას მოუხადოს ბოდიში, რომ იმუშავა ქვეყნის წინააღმდეგ“,-აღნიშნა მინისტრმა.

შეგახსენებთ, რომ ევროსასამართლოს მოსამართლეებად საქართველოდან წარდგენილი კანდიდატების სიის ჩავარდნაში თეა წულუკიანმა ნაციონალური მოძრაობა, რამდენიმე არასამთავრობო ორგანიზაცია, ადვოკატთა ასოციაციის თავმჯდომარე ზაზა ხატიაშვილი და სახალხო დამცველი უჩა ნანუაშვილი დაადანაშაულა. მინისტრის თქმით, ეს ადამიანები სტრასბურგში წარდგენილი კანდიდატების საწინააღმდეგოდ მუშაობდნენ.

საპასუხოდ უჩა ნანუაშვილმა განაცხადა, რომ წულუკიანმა ან მტკიცებულებები წარადგინოს, ან მას ბოდიში მოუხადოს.

მონიკა დავლიანიძე