პოლიტიკა

თვითმიზანი არ არის ვეტოს გადალახვა - ირაკლი კობახიძე

მარკერით დავიწყე ვეტოს კითხვა, თუმცა მოსანიშნიც არაფერი იყო, იმდენად მშრალად არის წარმოდგენილი პრეზიდენტის შენიშვნები, - განაცხადა პარლამენტის თავმჯდომარემ ირაკლი კობახიძემ მედიაორგანიზაციების წარმომადგენლებთან შეხვედრაზე, სადაც მაუწყებლობის შესახებ კანონში განხორციელებულ ცვლილებებზე მსჯელობენ.

მისი თქმით, ვეტოში საუბარია იმაზე, რომ არ მოსწონთ, თუმცა რა არ მოსწონთ, ან რატომ არ მოწონთ, არ არის გაშლილი.

”თვითმიზანი არ არის ვეტოს გადალახვა. ჩვენ კიდევ ერთხელ გვინდა ვიმსჯელოთ იმასთან დაკავშირებით, თუ რა პლუსებს და მინუსებს ვხედავთ ამ კანონპროექტთან დაკავშირებით, რათა შევძლოთ საბოლოო გადაწყვეტილების მიღება ამ კანონპროექტთან დაკავშირებით. მე როგორც ვიცი, ვეტოს ტექსტი შემუშავებული იქნა მათ შორის თქვენთან კონსულტაციების შედეგად. ვეტოსთან დაკავშირებით ველოდებით არგუმენტებს, რომლებიც დაასაბუთებდა კანონპროექტის მიზანშეუწონლობას, თუმცა არანაირი არგუმენტები ვეტოს ტექსტში წარმოდგენილი არ არის. ეს არის ვეტოს ტექსტში არსებული საერთო სურათი. იგივე მდგომარეობა გვქონდა წინა ვეტოებთან მიმართებაში. წინა ვეტო უკავშირდებოდა საარჩევნო კოდექსს, თუმცა იქაც არც ერთი არგუმენტი არ იყო რეალურად წარმოდგენილი. მარკერით დავიწყე ვეტოს კითხვა, თუმცა მოსანიშნიც არაფერი იყო, იმდენად მშრალად არის წარმოდგენილი პრეზიდენტის შენიშვნები. ვეტოში საუბარია იმაზე, რომ არ მოსწონთ, თუმცა რა არ მოსწონთ ან რატომ არ მოსწონთ, არ არის გაშლილი. თუ ამაზე მეტ არგუმენტებს დღეს ვერ მოვისმენთ, მაშინ ბუნებრივია, პოზიცია დარჩება უცვლელი”, - განაცხადა კობახიძემ მედიასაშუალებების წარმომადგენლებთან საუბრისას.