პოლიტიკა

თვითმფრინავები გადავსებულია, რომლებიც საქართველოში მოფრინავენ - მაროშ შევჩოვიჩი

საქართველოში ტურისტები მთელი მსოფლიოდან ჩამოდიან. მნიშვნელოვანია, რომ ახალგაზრდებს საშუალება აქვთ იმოგზაურონ, - განაცხადა ევროკომისიის ვიცე-პრეზიდენტმა ენერგეტიკული კავშირის საკითხებში მაროშ შევჩოვიჩმა ბათუმში, რიგით მე-14 საერთაშორისო კონფერენციის „საქართველოს ევროპული გზა - რეგიონული სტაბილურობის უზრუნველყოფა“ ფარგლებში.

„გუშინ ძველ ქალაქში გავისეირნეთ. შეგიძლიათ იხილოთ, რომ ტურისტები მთელი მსოფლიოდან ჩამოდიან. თვითმფრინავები გადავსებულია, რომლებიც საქართველოში მოფრინავენ და პირიქით. განსაკუთრებით მნიშვნელოვანია, რომ ახალგაზრდებს საშუალება აქვთ იმოგზაურონ“, - განაცხადა მაროშ შევჩოვიჩმა.

მაროშ შევჩოვიჩმა საქართველოს ხელისუფლებასა და მოქალაქეებს უვიზო მიმოსვლა მიულოცა.

მისი თქმით, ასოცირების ხელშეკრულების ძალაში შესვლის შემდეგ, საქართველომ სერიოზული პროგრესი ყველა სფეროში - ეკონომიკურ, პოლიტიკურ, სავაჭრო, საგარეო, უსაფრთხოების პოლიტიკაში მიაღწია.

„მე სლოვაკეთის ელჩი ვიყავი ევროკავშირში. მესმის რამდენად რთულია უვიზო რეჟიმის მოთხოვნების დაკმაყოფილება, შენგენის ზონაში გაწევრიანება. მოთხოვნებია ძალიან მაღალი დონის, ასევე ვიწროტექნიკური ხასიათისა და სერიოზული ძალისხმევაა ჩასადები ამ მიზნების მისაღწევად.

მე ვულოცავ ქართველ კოლეგებს. უვიზო რეჟიმი აღნიშნავს ახალ მიმართულებას ევროკავშირ-საქართველოს ურთიერთობის, მაგრამ უფრო მნიშვნელოვანია, რომ სერიოზული პროგრესი მიღწეულია ყველა სფეროში - ეკონომიკურ, პოლიტიკურ, სავაჭრო, საგარეო, უსაფრთხოების პოლიტიკაში, მას შემდეგ, რაც ასოცირების ხელშეკრულება ძალაში შევიდა“, - განაცხადა მაროშ შევჩოვიჩმა.

ნინო ექვთიმიშვილი