პოლიტიკა

ტვ პირველის ინფორმაციით, გლდანში არხის ჟურნალისტს ფიზიკურად დაუპირისპირდნენ

ტელეკომპანია „პირველის“ ინფორმაცით, არხის ჟურნალისტ თათია ჩაფიჩაძეს მუშაობისას ხელი დაარტყეს. ინციდენტი გლდანში, ახმეტელის მეტროს მიმდებარე ტერიტორიაზე მოხდა.

ჟურნალისტი ცდილობდა ტელეფონით გადაეღო, როგორ გადაჰყვათ ავტობუსებით ამომრჩევლები რეგიონებში. მისივე მონაყოლიდან ირკვევა, რომ ჟურნალისტს საქმე ჰქონდა მოძრაობა „არა ნაციზმის!“ წევრებთან, რომლებიც „აგრესიით გამოირჩეოდნენ“.

„ახმეტელის თეატრის მიმდებარე ტერიტორიაზე მობილიზებული არიან კონკრეტული დაჯგუფებები მაისურებზე წარწერით „არა ნაციზმს!“. როგორც ისინი ჩვენთან საუბრისას აცხადებენ, სახალხო მოძრაობა უზრუნველყოფს ადამიანების ტრანსპორტირებასა და ამ გზით ხმის მიცემის პროცედურების გამარტივებას. ჩვენ დავინტერესდით კონკრეტული დაჯგუფებების წარმომადგენლები რა მიზეზით იმყოფებოდნენ, რადგან დაახლოებით ერთსაათიან პერიოდში ისინი ადგილიდან არ დაძრულან, თუმცა ჩვენ გვაქვს ამისი ვიდეო- და ფოტომასალა. გამოირჩეოდნენ საკმაოდ დიდი აგრესიით და კითხვაზე, თუ რატომ არიან მოსულები, რამდენიმე მათგანმა შეეცადა ჩემთვის ტელეფონის წართმევაც. მათ შორის იყო ფიზიკური შეურაცხყოფაც, რადგან რამდენიმე ქალბატონმა სცადა, ხელით სახეში ჩარტყმასა და ტელეფონის ამ გზით წართმევას“, - განახადა ჩაფიჩაძემ „ტვ პირველის“ ეთერში ჩართვისას.

მისივე თქმით, იმ ადამიანებმა განუცხადეს, რომ „ არიან მოსულები ნაციონალების ამოსაძირკვად“.

არხმა ინციდენტის ამსახველი ვიდეომასალაც გამოაქვეყნა ფეისბუკის საკუთარ გვერდზე.