სამართალი

თურქეთის მოთხოვნას ჩაბუქის ექსტრადირების შესახებ არა სამართლებრივი, არამედ - პოლიტიკური მოტივი უდევს - საია

საქართველოს ახალგაზრდა იურისტთა ასოციაციამ დემირელის კოლეჯის ყოფილი მენეჯერის, მუსტაფა ემრე ჩაბუქის ექსტრადაციის საქმეზე თბილისის საქალაქო სასამართლოს მეგობრის მოსაზრებები წარუდგინა. ორგანიზაციის ინფორმაციით, პროკურატურამ ექსტრადიციის დასაშვებობის საკითხის გადასაწყვეტად თბილისის საქალაქო სასამართლოს უკვე მიმართა.

საიას მიერ მიწოდებულ მოსაზრებებში ნათქვამია იმ საფუძვლებზე, რომლებიც გამორიცხავს პირის ექსტრადაციას სხვა ქვეყანაში, კერძოდ, თურქეთში.

„სასამართლო მეგობრის მოსაზრებებში საია მიმოიხილავს საქართველოს კანონმდებლობისა და საქართველოსთვის შესასრულებლად სავალდებულო საერთაშორისო სამართლის ნორმების შესაბამისად, რა სტანდარტებისა და პრინციპების გათვალისწინებით უნდა იხელმძღვანელოს სასამართლომ საკითხის გადაწყვეტისას. კერძოდ, განხილულია ყველა ის საფუძველი, რა შემთხვევაშიც ქვეყანას (სასამართლოს) არ შეუძლია, მიიღოს გადაწყვეტილება პირის ექსტრადირების თაობაზე. დეტალურადაა განხილული, რა ფაქტობრივ-სამართლებრივი გარემოებები უნდა შეისწავლოს სასამართლომ საიმისოდ, რომ დაადგინოს, ან გამორიცხოს აღნიშნული საფუძვლების არსებობა კონკრეტულ საქმეში. ასევე მიმოხილულია თურქეთში ადამიანის უფლებების დაცვის თვალსაზრისით არსებული საგანგაშო ვითარება, რაც, ზემოაღნიშნული სტანდარტების გათვალისწინებით, აუცილებელია, გადაწყვეტილების მიღებისას სასამართლომ სათანადოდ შეაფასოს და გაითვალისწინოს“, - ნათქვამია განცხადებაში.

საიას მტკიცებით, ჩაბუქის ექსტრადაცია დაუშვებელია, რადგან:

- საქმეში არსებული გარემოებები ამყარებს იმ ვარაუდს, რომ თურქეთის მხრიდან დაყენებულ მოთხოვნას ექსტრადირების თაობაზე საფუძვლად უდევს არა სამართლებრივი, არამედ - პოლიტიკური მოტივი;

- არსებობს სერიოზული და აშკარა საფუძველი იმის სარწმუნებლად, რომ ჩაბუქს თურქეთისათვის გადაცემის შემთხვევაში ემუქრება რეალური საშიშროება, დაექვემდებაროს წამებას, არაადამიანურ და ღირსების შემლახავ მოპყრობას ან/და ვერ ისარგებლოს სამართლიანი სასამართლოს უფლებით;

- თურქეთში ადამიანის უფლებათა საგანგაშო მდგომარეობისა და წამებისა და არასათანადო მოპყრობის პრაქტიკის ფონზე, დიპლომატიური გარანტიები წარმოადგენს მხოლოდ დაპირებას, რომელიც არაეფექტურია ადამიანის წამების რისკების თავიდან ასარიდებლად.

თურქეთის მოქალაქე მუსტაფა ემრე ჩაბუქი 24 მაისს დააკავეს თურქეთის მხარის მოთხოვნით, რომელიც ამტკიცებს, რომ ჩაბუქი ტერორისტული ორგანიზაციის საქმიანობაში იყო ჩართული. დაკავებულსა და მის ოჯახს საქართველოს დევნილთა სამინისტრომ ლტოლვილთა სტატუსსზე უარი უთხრა.

დემირელის კოლეჯის ყოფილ მენეჯერს წინსაექსტრადაციო პატიმრობის დრო საქართველოს საპატიმროში 24 თებერვალს უმთავრდება.