პოლიტიკა

თურქეთი იძლევა დიპლომატიურ გარანტიას, რომ მუსტაფა ემრე ჩაბუქს თურქულ ციხეში წამება არ დაემუქრება - სოზარ სუბარი

საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების მინისტრი სოზარ სუბარი გამოეხმაურა სააპელაციო სასამართლოს გადაწყვეტილებას, რომელმაც მუსტაფა ემრე ჩაბუქს ლტოლვილის სტატუსი არ მიანიჭა.

სოზარ სუბარმა გაამახვილა ყურადღება ჩაბუქის ადვოკატის განცხადებებზე, რომლის თანახმად, თურქეთის ციხეებში მძიმე ვითარებაა ადამიანთა უფლებების დაცვის კუთხით და იქ გადაყვანის შემთხვევაში დემირელის კოლეჯის ყოფილი მენეჯერის სიცოცხლეს საფრთხე დაემუქრება.

ლტოლვილთა და განსახლების მინისტრის მტკიცებით, თურქეთმა, როგორც საქართველოს მოკავშირე სახელმწიფომ, გარანტია მისცა თბილისს, რომ თურქულ ციხეში ჩაბუქს წამება არ დაემუქრება.

„ყველა საერთაშორისო ანგარიში თურქეთში 2016 წლის ამბოხების ჩახშობის შემდეგ ამბობდა, რომ თურქეთის ციხეებში იყო ძალიან სერიოზული ადამიანის უფლებების დარღვევები და მათ შორის წამების ფაქტებიც. 2016 წლის ბოლოს ეს ანგარიშები შეიცვალა და ისეთი ავტორიტეტული ორგანიზაციები, როგორიც არის გაეროს სპეციალური მომხსენებელი წამების საკითხებში, აშშ-ის სახელმწიფო დეპარტამენტი, ინგლისის სახელმწიფო ანგარიში, ამბობდნენ, რომ 2016 წლის ბოლოდან მდგომარეობა მკვეთრად გაუმჯობესდა და ამ მხრივ ის საგანგაშო ვითარება აღარ არის. საერთაშორისო არასამთავრობო ორგანიზაციები - Human Rights Watch, Amnesty International გაცილებით უფრო კრიტიკულები არიან, ვიდრე სახელმწიფო ორგანიზაციები, თუმცა ამ შემთხვევაში ჩვენ არანაირი საფუძველი არ გვაქვს, არ ვენდოთ თუნდაც წამების საკითხებში გაეროს სპეციალურ მომხსენებელს. როდესაც თურქეთის სახელმწიფო, ჩვენი მეგობარი და მეზობელი სახელმწიფო, იძლევა დიპლომატიურ გარანტიას, რომ თუ მოხდება ჩაბუქის ექსტრადირება, მოთავსდება ისეთ დაწესებულებაში, სადაც მას არ დაემუქრება წამება, ასევე საქართველოს დიპლომატიურ წარმომადგენლებს ექნებათ მისი ნახვის საშუალება, ეს ჩვენთვის არის მყარი გარანტია. შესაძლოა, გარკვეული პრობლემები არსებობდეს თურქეთის ციხეში, მაგრამ ამ კონკრეტულ ადამიანთან დაკავშირებით არის გარანტია, რომ ეს პრობლემები არ იარსებებს. ეს გარანტია არის ძალიან სერიოზული და ყურადსაღები ჩვენთვის“,- განაცხადა სუბარმა.

სუბარის თქმით, ლტოლვილის სტატუსზე უარის თქმა არ გულისხმობს ჩაბუქისა და მისი ოჯახის ექსტრადირებას. მინისტრმა აღნიშნა, რომ ექსტრადირების საკითხზე მსჯელობა დაიწყება ლტოლვილის სტატუსთან დაკავშირებით განხილვების დასრულების შემდეგ.

სააპელაციო სასამართლომ პირველი ინსტანციის სასამართლოს გადაწყვეტილება ძალაში დატოვა და დემირელის კოლეჯის ყოფილ მენეჯერს მუსტაფა ემრე ჩაბუქსა და მის ოჯახს საქართველოში ლტოლვილის სტატუსის მინიჭებაზე უარი უთხრა.

მუსტაფა ემრე ჩაბუქი 24 მაისს თურქეთის მხარის მოთხოვნით დააკავეს და მას ბრალად ტერორისტულ ორგანიზაციასთან თანამშრომლობა ედება. თურქეთი მის ექსტრადირებას მოითხოვს. დემირელის კოლეჯის ყოფილ მენეჯერს წინსაექსტრადაციო პატიმრობის დრო საქართველოს საპატიმროში 24 თებერვალს უმთავრდება.