პოლიტიკა

თუკი პრეზიდენტი მონაწილეობას მიიღებს მომავალ საპრეზიდენტო არჩევნებში,ეს იქნება მისი კიდევ ერთი ფიასკო - დავით მათიკაშვილი

საპარლამენტო უმრავლესობის წევრის, დავით მათიკაშვილის განცხადებით, პრეზიდენტი გიორგი მარგველაშვილი მარგინალურ ფიგურად ჩამოყალიბდა, რომელიც ვერ ხედავს „ქართული ოცნების“ მმარტველობის პერიოდში მიღწეულ პროგრესს. ასე გამოეხმაურა მათიკაშვილი პრეზიდენტის ადმინისტრაციის ხელმძღვანელის, გიორგი აბაშიშვილის განცხადებას, რომლის მიხედვით, უმრავლესობა თავს ესხმის გიორგი მარგველაშვილს, როცა ის საზოგადოების წარმომადგენლებთან შეხვედრას მართავს, რადგან მმართველი პარტია საპრეზიდენტო არჩევნებზე ნერვიულობს.

დეპუტატის შეფასებით, თუკი გიორგი მარგველაშვილი მომავალ საპრეზიდენტო არჩევნებში წააყენებს თავის კანდიდატურას, ეს ფიასკოთი დასრულდება.

„ჩემდა სამწუხაროდ, პრეზიდენტი მარგინალურ ფიგურად ჩამოყალიბდა, რომელიც არ სცემს პატივს იმ ღირებულებებს, რომლის გამოც ქართველმა ხალხმა „ქართულ ოცნებას“ დაუჭირა მხარი. მთელი ეს პერიოდი სწორედ სახელმწიფო ინსტიტუტების გაძლიერებასა და შენებას მოანდომა ჩვენმა ხელისუფლებამ. ამ პროგრესს და ამ წარმატებას ხედავს მთელი მსოფლიო. ეს ყველაფერი არ უნდა დაინახოს მხოლოდ პრეზიდენტმა და მისმა ადმინისტრაციამ.

რაც შეეხება მომავალ საპრეზიდენტო არჩევნებს, თუკი პრეზიდენტი გადაწყვეტს და მონაწილეობას მიიღებს მომავალ საპრეზიდენტო არჩევნებში, მე ვარწმუნებ მას, მის ადმინისტრაციასა და საზოგადოებას, რომ ეს იქნება კიდევ ერთი ფიასკო გიორგი მარგველაშვილის, რომელსაც საზოგადოება დაინახავს“, - განაცხადა მათიკაშვილმა.