პოლიტიკა

თუკი მზადყოფნა არსებობს „ქართული ოცნების“ მხრიდან, ეს შეხვედრა აუცილებლად შედგება - დავით მათიკაშვილი

საპარლამენტო უმრავლესობის წევრი, დავით მათიკაშვილი გამოეხმაურა პრეზიდენტის შემოთავაზებას, ხვალ 16 საათზე შეხვდეს მმართველ გუნდს კონსტიტუციაზე სალაპარაკოდ. მისი თქმით, შეხვედრა გაიმართება, რაკი სურვილი არსებობს.

„თუკი მზადყოფნა არსებობს „ქართული ოცნების“ მხრიდან და ასეთივე მზადყოფნა გააჩნია პრეზიდენტს, ეს შეხვედრა აუცილებლად შედგება“, - განაცხადა მათიკაშვილმა.

დეპუტატის თქმით, გუნდში გაარკვევენ, ვინ წავა პრეზიდენტტან შეხვედრაზე.

„ვინ მივა და შემადგენლობა როგორი იქნება, ამაზე საუბარი გუნდის შიგნით გაიმართება“, -განაცხადა მათიკაშვილმა.

შეგახსენებთ, კონსტიტუციის მიღების შემდეგ პარლამენტის თავმჯდომარემ, ირაკლი კობახიძემ შესთავაზა პრეზიდენტ გიორგი მარგველაშვილს, ვეტო დაადოს ორ საკონსტიტუციო ცვლილებას. ერთ-ერთი მათგანი ეხება ბონუსის მექანიზმის გაუქმებას, ხოლო მეორე 2020 წლის საპარლამენტო არჩევნებისთვის ერთჯერადად ბლოკების შესაძლებლობის დატოვებას. მან აღნიშნა, რომ ამ საკითხზე სალაპარაკოდ მზადაა, ქვეყნის პირველ პირს შეხვდეს.

ახალი კონსტიტუცია საქართველოს პარლამენტმა 26 სექტემბერს მიიღო.

ანა მებურიშვილი