პოლიტიკა

თუ საჭიროება იქნება, საკონსტიტუციო ცვლილებებზე პრეზიდენტთან გავივლით კონსულტაციებს - ეკა ბესელია

საპარლამენტო უმრავლესობის წევრმა ეკა ბესელიამ არ გამორიცხა, რომ საკონსტიტუციო ცვლილებებთან დაკავშირებით მმართველმა გუნდმა კონსულტაციები პრეზიდენტთან გაიაროს.

როგორც ბესელიამ აღნიშნა, საყოველთაო-სახალხო განხილვების შეჯამების შემდეგ სახელისუფლებო გუნდი საკონსტიტუციო ცვლილებებთან დაკავშირებით შიდაკონსულტაციებს გამართავს ისეთ თემებზე, როგორიცაა სასოფლო-სამეურნეო დანიშნულების მიწების საკუთრება,არჩევნების სისტემა და პრეზიდენტის არჩევნების ჩატარების ვადები.

„ამ საკითხზე გუნდში კონსულტაციები არ გვქონია. იმ ვითარებაში, როდესაც სახალხო განხილვები დასრულდა და პარლამენტში გადმოინაცვლა განხილვის ეტაპმა, ამ ფორმატში ჩვენ პირველი რაც უნდა გავაკეთოთ, ესაა, შევაჯამოთ საერთო სახალხო განხილვის შედეგები და გადაწყვეტილებები მივიღოთ ამ ფორმატში გამოთქმული მოსაზრებებიდან გამომდინარე. რამდენიმე საკითხი, რაზეც კონსულტაციებს ვაპირებთ, ეს ეხება სასოფლო-სამეურნეო დანიშნულების მიწების საკუთრებასთან დაკავშირებულ საკითხს, არჩევნების სისტემის ცვლილებასა და ასევე პრეზიდენტის არჩევნების ჩატარების ვადებს. ამ საკითხზე გუნდს ექნება შიდა კონსულტაციები, თუ გადავწყვეტთ, რომ საჭირო არის კიდევ დამატებითი კონსულტაციები გარეთაც, მათ შორის პრეზიდენტთან, ამაზე ალბათ მოგვიანებით გუნდის შიგნით იქნება გარკვეული საუბარი“,- განუცხადა ჟურნალისტებს ბესელიამ.

ანა მებურიშვილი