პოლიტიკა

თუ რუსეთი ამ ბარიერს მოხსნის, დიპლომატიური ურთიერთობის აღდგენას წინ არაფერი უდგას - ზაქარია ქუცნაშვილი

დიპლომატიური ურთიერთობის აღდგენა გამორიცხულია იმ ბარიერის დაძლევამდე, რა ბარიერიც შეიქმნა საქართველოს ტერიტორიების ოკუპაციის შედეგად, - განაცხადა ,,ქართული ოცნების’’ წევრმა, ზაქარია ქუცნაშვილმა დღევანდელ პრესკონფერენციაზე რუსეთ-საქართველოს ურთიერთობაზე საუბრისას.

,,თუ რუსეთი ამ ბარიერს მოხსნის, დიპლომატიური ურთიერთობის აღდგენას წინ არაფერი უდგას. რაც შეეხება იმას, გვჭირდება თუ არა კონსულტაციები ოკუპანტ ქვეყანასთან, ჩვენ ეს გვჭირდება. მე ძალიან მომეწონა პრემიერის პოზიცია. ჩვენ გვჭირდება ეს ურთიერთობა, რომ ევროპასთან ინტეგრაციის პროცესი ჰარმონიულად, ნაკლები წინააღმდეგობის ფონზე განვითარდეს", - განაცხადა ზაქარია ქუცნაშვილმა.

ის ასევე, გამოეხმაურა, რუსეთის ფედერაციის სახელმწიფო სათათბიროს დსთ-ის საქმეთა, ევრაზიული ინტეგრაციისა და თანამემამულეებთან ურთიერთობის საკითხთა კომიტეტის თავჯდომარის, ლეინოდ კალაშნიკოვის გუშინდელ განცხადებას, რომელმაც მზადყოფნა გამოთქვა რუსეთ-საქართველოს შორის საპარლამენტო თანამშრომლობის განახლების საკითხის ინიცირებაზე.

ზაქარია ქუცნაშვილის განცხადებით, ევროპული გზა საქართველოს ისტორიული არჩევანია და მას ვერაფერი შეცვლის.

,,ვერც კალაშნიკოვი და ვერც სხვა საქართველოს ისტორიულ არჩევანს ვერ შეცვლის’’, - განაცხადა ზაქარია ქუცნაშვილმა.

ნინო ექვთიმიშვილი