სამართალი

თუ რესტრუქტურიზაცია განხორციელდება კანონის დაცვით, „ომეგა ჯგუფი“ დავალიანებას „კაპიკ-კაპიკ“ გადაიხდის - ნატო ჩხეიძე

თუ რესტრუქტურიზაცია განხორციელდება კანონის დაცვით, „ომეგა ჯგუფი“ დავალიანებას „კაპიკ-კაპიკ“ გადაიხდის, როგორც ეს პარლამენტის თავმჯდომარემ აღნიშნა, - განუცხადა ჟურნალისტებს ტელეკომპანია ,,იბერიას“ დამფუძნებელმა, დეპუტატმა ნატო ჩხეიძემ გუშინ, საქალაქო სასამართლოში მისი გამოკითხვის დასრულების შემდეგ.

„ომეგა ჯგუფს“ უკვე მოთხოვნილი აქვს რესტრუქტურიზაცია. თუ დაკმაყოფილდება ეს მოთხოვნა კანონის დაცვით და ამუშავდება ფაბრიკა, „ომეგა ჯგუფი“ რა თქმა უნდა, მზად არის გადაიხადოს დავალიანება „კაპიკ-კაპიკ“, როგორც ეს პარლამენტის თავმჯდომარემ განაცხადა, რომელმაც ახლა უკვე შემოსავლების დეპარტამენტის უფროსის მოვალეობა შეითავსა“, - განაცხადა ნატო ჩხეიძემ.

ფინანსთა სამინისტროს ინფორმაციით, „ომეგა ჯგუფში“ შემავალ, სიგარეტის მწარმოებელ კომპანია შპს „ოჯთ-ის“ საგადასახადო დავალიანების სახით ერიცხება 51 მლნ 717 ათასი ლარი.