პოლიტიკა

თუ პრეზიდენტი ე.წ. ფარული მოსმენების კანონს ვეტოს დაადებს, ჩვენ ამას დავძლევთ - გია ვოლსკი

საპარლამენტო უმრავლესობის წევრის, გია ვოლსკის განცხადებით, გუშინ მეორე მოსმენით მიღებული კანონი ე.წ. ფარული მოსმენების შესახებ განსხვავდება წინამორბედი მოდელისგან

„პრაქტიკულად განუკითხაობისგან და დანაშაულებრივი სიტემისგან ჩვენ შევქმენით კონსტროლს დაქვემდებარებული ფარული საგამოძიებო მოქმედებების სისტემა. ასე რომ, პრეზიდენტსაც ექნება იმის დრო და საშუალება, რომ გაეცნოს კანონს“, - განაცხადა ვოლსკიმ ჟურნალისტებთან.

საკონსტიტუციო ცვლილებათა პაკეტის ერთ-ერთი ავტორის თქმით, თუ პრეზიდენტი ე.წ. ფარული მოსმენების ახალრედაქტირებულ კანონს ვეტოს დაადებს, უმრავლესობა მას, დიდი ალბათობით, დაძლევს.

„ჩვენ ვართ საერთაშორისო უსაფრთხოების სისტემის საკმაოდ სერიოზული ნაწილი, ამიტომ, ამასაც სერიოზულად უნდა შეხედოს პრეზიდენტმა. თუკი იქნება ვეტო, ჩვენ ვფიქრობთ, რომ უნდა დავძლიოთ“, - თქვა ვოლსკიმ.

შეგახსენებთ, რომ გუშინ პარლამენტის პლენარულ სხდომაზე მეორე მოსმენით მიიღეს საკონსტიტუციო ცვლილებათა პაკეტი ე.წ. ფარულ საგამოძიებო მოქმედებებთან დაკავშირებით.

როგორც საპარლამენტო ფრაქცია „ქართული ოცნების“ თავმჯდომარემ , მამუკა მდინარაძემ განაცხადა, კანონში ცვლილებები შევიდა. კერძოდ, სუს-ის უფროსი აღარ დანიშნავს ფარული მოსმენების განმახორციელებელი სააგენტოს უფროსის მოადგილეებს და აღარ დაამტკიცებს ამ უწყების დებულებას. პრემიერი უკვე კომისიის წარდგინებით დანიშნავს სააგენტოს ხელმძღვანელს.

რაც შეეხება ოპოზიციას, მისი თქმით, ეს ცვლილებები უმნიშვნელოა და კანონის ზოგად არსს არ ცვლის.

ანა მებურიშვილი