პოლიტიკა

თუ ევროკავშირში საქართველოს გაწევრიანების მომხრეთა კლება გრძელვადიანი ტენდენცია იქნება, მაშინ ყურადღება იქნება გასამახვილებელი - იანოშ ჰერმანი

საქართველოში ევროკავშირის ელჩის იანოშ ჰერმანის შეფასებით, ევროკავშირში გაწევრიანების მსურველთა კლების ტენდენცია მაშინ იქნება ყურადსაღები, თუკი ის მომავალშიც გაგრძელდება. ასე გამოეხმაურა უცხოელი დიპლომატი ეროვნულ-დემოკრატიული ინსტიტუტის (NDI-ის) კვლევას, რომლის მიხედვით, გამოკითხულთა 60% საქართველოს ევროკავშირში გაწევრიანების მომხრეა, რაც 5%-ით ნაკლებია 2017 წლის მაისში ჩატარებული კვლევის შედეგებზე.

„ყოველთვის არის სხვადასხვა გამოკითხვები ევროკავშირის მხარდაჭერაზე. ეს მხარდაჭერა სტატიკურია, თუმცა ზოგჯერ იზრდება ან იკლებს. რყევის დიაპაზონია, რომელიც ან მატულობს ან იკლებს. არა მგონია, რომ ამას რაიმე კონკრეტული მიზეზი უნდა მივაწეროთ. საზოგადოებრივი აზრის შესწავლის ორგანიზაციებმა და პოლიტოლოგებმა უნდა გაანალიზონ ეს მონაცემები. თუ ეს გრძელვადიანი ტენდენცია იქნება, მაშინ ყურადღება იქნება გასამახვილებელი, თუმცა სიტუაცია ასე არ დგას“, -თქვა ჰერმანმა.