სამართალი

თუ ჩვენ კარგად წავიკითხავთ წერილის შინაარსს, ზეწოლის ნიშნებს ვერ დავინახავთ - კახა სოფრომაძე

იუსტიციის უმაღლესი საბჭოს წევრი კახა სოფრომაძე მიიჩნევს, რომ უზენაესი სასამართლოს მოსამართლეებისთვის გაგზავნილ წერილში ზეწოლის ნიშნები არ იკვეთება.

როგორ სოფრომაძემ, პრესკონფერენციაზე საკითხის კომენტირებისას აღნიშნა, საზოგადოებამ სასამართლოს იმიჯს უნდა გაუფრთხილდეს.

მისი თქმით, სასამართლო სისტემა სენსიტიურია და ვიღაცამ აშენოს სასამართლოს სისტემა და ვიღაცამ ქვა ესროლოს - ამით საქმე არ გაკეთდება.

„სამი-ოთხი დღე საზოგადოება იყო ბუნდოვან სიტუაციაში – ვინ ვის უწევდა ზეწოლას და რა სახით, გაუგებარი დარჩა ხალხისთვის, ყველა უნდა გაუფრთხილდეს სასამართლოს იმიჯს. ვიღაცამ აშენოს სასამართლო სისტემა და ვიღაცამ ქვა ესროლოს, ამით საქმე არ გაკეთდება. სასამართლო სისტემა სენსიტიურია, ამიტომ საზოგადოება ფრთხილად უნდა მიუდგეს ამ საკითხს. ვიდრე არ მივიღებთ დასაბუთებულ ინფორმაციას, არ უნდა მივიღოთ გადაწყვეტილება. დღეების მანძილზე გვესმოდა, რომ ხორციელდებოდა ზეწოლა მოსამართლეებზე. თუ ჩვენ კარგად წავიკითხავთ წერილის შინაარსს, ზეწოლის ნიშნებს ვერ დავინახავთ. მუქარას ან შანტაჟს ადგილი არ აქვს. სანამ სკანდალი დაიწყებოდა, ცოტა უფრო მეტი ინფორმაცია უნდა მიეღო დაინტერესებულ მხარეებს და შემდეგ დაწყებულიყო ფაქტების გასაჯაროება“,-აღნიშნა სოფრომაძემ.

მისი თქმით, აღნიშნული წერილების არსებობის შესახებ მისთვის უცნობი იყო. თუმცა, როგორც სოფრომაძე აღნიშნავს, მას როგორც იუსტიციის უმაღლესი საბჭოს წევრისთვის ეს არც უნდა ყოფილიყო ცნობილი, რადგან იუსტიციის საბჭო საგამოძიებო ორგანო არ არის.

„ჩემთვის ეს უცნობი იყო, როცა ჟურნალისტებმა მკითხეს. წესით არც უნდა მცოდნოდა იმიტომ, რომ იუსტიციის საბჭო საგამოძიებო ორგანო არაა და თავი უნდა შევიკავოთ კომენტარებისგან. მე ვერავის ბრალს ვერ დავდებ, მაგრამ ჩემი პოზიცია ასეთია, რომ სუსტია სასამართლო სისტემის ნდობის საკითხი საზოგადოებაში, ამისთვის ყველამ უნდა იზრუნოს, რომ მივიღოთ დამოუკიდებელი სასამართლო. ფაქტია, რაც მოხდა კეთილისმსურველს არ გაუკეთებია“, - განაცხადა კახა სოფრომაძემ.

მონიკა დავლიანიძე