პოლიტიკა

თუ აზრი არ აქვს არაფერს, მაშინ პარლამენტში რისთვის ვსხედვართ?- ოთარ კახიძე დეპუტატებს

„ევროპული საქართველოს“ ერთ-ერთმა ლიდერმა, ოთარ კახიძემ მოუწოდა დეპუტატებს, შეწყვიტონ კინკლაობა ხორავას ქუჩაზე მოზარდების მკვლელობის საქმეზე დროებითი საპარლამენტო საგამოძიებო კომისიის შექმნის შესახებ.

„მას შემდეგ, რაც პრაქტიკულად მთელმა საქართველომ შეიტყო ხორავას ქუჩაზე მომხდარი ტრაგედიის შესახებ, გამოვიდა ქუჩაში ათი ათასობით ჩვენი მოქალაქე და გააპროტესტა გამოძიება. ეს საზოგადოება პარლამენტისგან ელის პასუხს, თუ რა პასუხს გავცემთ ჩვენ იმ კითხვებს, რომლებიც დაგროვდა და შევასრულებთ თუ არა იმ ფუნქციას, რომელიც ხალხმა დაგვაკისრა?!

მე მიმაჩნია, რომ უნდა არსებობდეს რაღაც საკითხები მაინც, რომლის განხილვის დროსაც არ დავიწყებთ პოლიტიკურ კინკლაობას, არ დავიწყებთ იმის გარჩევას, ადრე ვინ ვინ დააწინაურა, არჩევნებზე ვინ რას აკეთებდა, ვინ რას ლაპარაკობდა. უნდა არსებობდეს საკითხი, რაზეც ამის განხილვის გარეშე ავიღებთ იმ პასუხისმგებლობას, რომელიც ჩვენმა ამომრჩეველმა დაგვაკისრა. თუ აზრი არ აქვს არაფერს, მაშინ პარლამენტში რისთვის ვსხედვართ? და თუ აქვს და დიახაც, აქვს აზრი მუშაობას, მაშინ ავიღოთ პასუხისმგებლობა და გავარკვიოთ რეალურად რა მოხდა. ჩვენ ყველაფერს გავაკეთებთ, რომ ბატონმა ზაზამაც და მთელმა საზოგადოებამაც გაიგოს სიმართლე. მოგიწოდებთ, რომ შევწყვიტოთ პოლიტიკური კინკლაობა ამ თემაზე“, - განაცხადა კახიძემ პარლამენტის რიგგარეშე სხდომაზე.