საზოგადოება

ცოტა დაგვიანების შემთხვევაში, შეიძლება, ფატალურად დამთავრებულიყო - 87-ე სკოლაში მენინგოკოქცემიის ფაქტი დაფიქსირდა

8 წლის ბავშვს მენინგოკოქცემიის დიაგნოზით ინფექციურ საავადმყოფოში მკურნალობენ. მოზარდი კლინიკაში 21 ნოემბერს მძიმე მდგომარეობაში შეიყვანეს.

87-ე საჯარო სკოლაში, სადაც მენინგოკოქცემიის ფაქტი დაფიქსირდა, მშობლები დეზინფექციის ჩატარებას ითხოვენ. ისინი აქციის გამართვასაც აპირებენ.

მშობლები გეგმავენ, რომ მოითხოვონ დეზინფექციის ჩატარება, რის გამოც აუცილებელია, რომ სკოლამ 24 საათის განმავლობაში ფუნქციონირება შეწყვიტოს.

მშობლები ამბობენ, რომ მათ არ დაჰყავთ შვილები სკოლაში, რადგან ეშინიათ, არ მოხდეს ვირუსის გავრცელება სხვა ბავშვებშიც.

„მენინგიტი დაუდგინდა ერთ-ერთ ბავშვს 21 ნოემბერს, თურმე, ოღონდ ჩვენ არ ვიყავით მშობლები ინფორმირებული. გრძელდებოდა ბავშვების სიარული სკოლაში. არის კიდევ რამდენიმე ფაქტი, ბავშვები არიან ავად, ოღონდ ჯერ არ ახმაურებენ. სკოლაში ბავშვები არ დადიან, არ ვატარებთ, ჩვენ დეზინფექციას ვითხოვთ და კარანტინის გამოცხადებას რამდენიმე დღე და აქამდე უნდა ჩაეტარებინათ, მაგრამ არ ჩაატარეს იმიტომ, რომ იყო არჩევნები,“ - ამბობს ერთ-ერთი მშობელი, ანა ბებოშვილი.

თავის მხრივ, როგორც სკოლის ადმინისტრაციაში ამბობენ, მათ უკვე მიმართეს ჯანდაცვის სამინისტროს და ელოდებიან პასუხს, თუ რა გადაწყვეტილებას მიიღებს უწყება. სკოლაში არ იციან, ზუსტად სად დაინფიცირდა ბავშვი მენინგოკოქცემიით, ეს მოხდა სკოლაში თუ სხვაგან.

სკოლაში ამბობენ, რომ მოზარდი სასწავლო დაწესებულებაში 21 ნოემბრის შემდეგ არ მისულა, საავადმყოფოში კი 26 ნოემბერს გადაიყვანეს.

რაც შეეხება ბავშვის მდგომარეობას, მის სიცოცხლეს საფრთხე არ ემუქრება. ინფექციონისტ კახა ჩომახიძის განცხადებით, ამ დროისთვის ბავშვის მდგომარეობა დამაკმაყოფილებელია.

,,შემოვიდა რეანიმაციულ განყოფილებაში და უკვე გადაყვანილია ნეიროინფექციების განყოფილებაში, მდგომარეობა საკმაოდ გაუმჯობესებულია. საკმაოდ მძიმე დიაგნოზია, ცოტა დაგვიანების შემთხვევაში, შეიძლება, ფატალურად დამთავრებულიყო, მაგრამ ყველაფერი დროულად დაიწყ. ყველაფერი დროულად და ნორმალურად წარიმართა და ბავშვის მდგომარეობა ახლა დამაკმაყოფილებელია,“ - განაცხადა კახა ჩომახიძემ.