პოლიტიკა

წინასაარჩევნო პერიოდში სოციალურ ქსელში ოპოზიციური კანდიდატების წინააღმდეგ დეზინფორმაციის კამპანიები დაიწყო - არასამთავრობოები წინასაარჩევნო პერიოდში გამოვლენილ ხარვეზებზე

არასამთავრობო ორგანიზაციებმა „სამართლიანმა არჩევნებმა“ და „დემოკრატიის საერთაშორისო საზოგადოებამ“ წინასაარჩევნო გარემოს მონიტორინგის შუალედური ანგარიში გამოაქვეყნეს. დოკუმენტი მოიცავს 24 ივლისიდან 4 სექტემბრამდე პერიოდს, ასევე იმ მოვლენებს, რომლებიც 24 ივლისამდე დაიწყო და დაკვირვების განხორციელების პერიოდშიც გაგრძელდა.

ორგანიზაციების მონაცემებით, საანგარიშო პერიოდში დაფიქსირდა ფიზიკური დაპირისპირების 2; ზეწოლა-მუქარის 2; სავარაუდოდ პოლიტიკური ნიშნით სამსახურიდან გათავისუფლების 1; ადმინისტრაციული რესურსის გამოყენების 3; დამკვირვებლისთვის ხელის შეშლის 1 ფაქტი.

მონიტორინგმა 8 საარჩევნო ოლქში გამოავლინა გარკვეული ხარვეზები საუბნო-საარჩევნო კომისიების დაკომპლექტების პროცესში. ანგარიშის მიხედვით, სოციალურ ქსელებში ოპოზიციური კანდიდატების, კერძოდ თბილისის მერობის ოპოზიციონერი კანდიდატების წინააღმდეგ დეზინფორმაციის კამპანიები დაიწყო. 38 მუნიციპალიტეტში საბიუჯეტო რესურსების სავარაუდო მობილიზების შემთხვევები და უფასო სამედიცინო მომსახურების გაწევის 5 შემთხვევა დაფიქსირდა.

ორგანიზაციების ინფორმაციით, წინასაარჩევნო პერიოდში 40-მდე მუნიციპალიტეტში საბიუჯეტო ცვლიელებები შევიდა, ხოლო სახელმწიფო და თვითმმართველობის ბიუჯეტით განსაზღვრული სოციალური და ინფრასტრუქტურული პროექტები ისეა დაგეგმილი, რომ ძირითადი აქტივობები ხშირ შემთხვევაში საარჩევნო კამპანიის პერიოდს ემთხვევა.

ანა მებურიშვილი