სამართალი

წინამოწვევის პარლამენტმა რეკომენდაციები შეიმუშავა, რომელიც წარსულში ჩადენილი საქმეების გამოძიების გაგრძელებას ეხება- ეკა ბესელია

თბილისში, საჯარო დისკუსია თემაზე „წარსულში ადამიანის უფლებათა დარღვევები და სახელმწიფო რეაგირების პოლიტიკა“ გაიმართა.

ღონისძიებას პარლამენტის იურიდიულ საკითხთა კომიტეტის თავმჯდომარე, მთავარი პროკურატის წარმომადგენელი და არასამთავრობო სექტორის წარმომადგენლები ესწრებიან.

საჯარო დისკუსიის მონაწილეების ძირითადი განხილვის საგანია, თუ რა სახის პრევენციული ზომები და პრევენციული მექანიზმები გააჩნია სახელმწიფოს ამ მხრივ და როგორია მისი რეაგირების პოლიტიკა.

როგორც საკითხის კომენტირებისას მედიას პარლამენტის იურიდიულ საკითხთა კომიტეტის თავმჯდომარემ ეკა ბესელიამ განუცხადა, 2013 წლიდან ამ მიმართულებით რამდენიმე მასშტაბური ნაბიჯი იქნა გადადგმული.

„პირველი, ეს იყო ფართომასშტაბიანი ამნისტია, ეს იყო სისხლის სამართლის კანონმდებლობის ცვლილება, ეს იყო ძალიან მნიშვნელოვანი შეფასება პოლიტიკური და სამართლებრივი, რომლითაც შეფასდა წარსულში ჩადენილი სისტემური დარღვევები ადამიანის უფლებების კუთხით და ბოლოს რეკომენდაციების დიდი პაკეტი, რომელიც პარლამენტმა მიიღო და დაამტკიცა 2016 წელს, წინამოწვევის პარლამენტში. ამ რეკომენდაციებში განისაზღვრა რა უნდა განხორციელდეს კონკრეტულად უფლებრივი კუთხით და ეს ეხება როგორც წარსულში ჩადენილი საქმეების გამოძიების გაგრძელებას, ასევე მარეაბილიტირებელ ღონისძებებს და საკანონმდებლო ცვლილებებს“,-აღნიშნა ბესელიამ.

მონიკა დავლიანიძე