პოლიტიკა

ცესკო ფეხდაფეხ მიჰყვა ხელისუფლების თამაშს - ალეკო ელისაშვილი

თბილისის მერობის დამოუკიდებელი კანდიდატის, ალეკო ელისაშვილის განცხადებით, ცენტრალური საარჩევნო კომისია ხელისუფლებას გაურიგდა და მისი დროულად რეგისტრაცია შეაფერხა.

„რეგისტრაციას „გვიხარვეზებდნენ“. გუშინ თქვეს საბოლოო პასუხი, ალბათ, ახალ შარს მოერიდნენ. არადა, საინიციატივო ჯგუფის მიერ ვიყავი წარდგენილი. ყველაზე დიდი პრეტენზია მაქვს იმაზე, რომ მთელი ამ ხნის განმავლობაში, ცესკოში ბლანკებს არ გვაძლევდნენ. ვიცოდით, რომ არჩევნები 21 ოქტომბერს უნდა ყოფილიყო. გუშინ მოგვცა სამი ფარატინა ბლანკი. ცესკო ფეხდაფეხ მიჰყვა ხელისუფლების თამაშს. გათვლა ჰქონდა იმაზე, რომ ამოვეგდე რეგისტრაციიდან“, - განუცხადა ელისაშვილმა ჟურნალისტებს.

ელისაშვილის თქმით, რეგისტრაციისთვის საჭირო ბლანკები მას „ერთი თვის ხვეწნის შემდეგ“ მისცეს.

შეგახსენებთ, ელისაშვილმა თბილისის მერობის არჩევნებში მონაწილეობის მისაღებად ცესკოს 1-ელ სექტემბრამდე 10 000 ხელმოწერა უნდა წარუდგინოს. გადაწყვეტილება ეფუძნება 21 აგვისტოს მიღებულ დადგენილებას, რომლის მიხედვით თვითმმართველი ქალაქის/თვითმმართველი თემის მერობის კანდიდატის წარდგენის მიზნით ამომრჩეველთა საინიციატივო ჯგუფმა კენჭისყრამდე არაუგვიანეს 57-ე დღისა განცხადებით უნდა მიმართოს შესაბამის საარჩევნო კომისიას, რის შემდეგაც უფლება აქვს, შეაგროვოს მხარდამჭერ ამომრჩეველთა ხელმოწერები.

ანა მებურიშვილი