პოლიტიკა

ცერცვაძის საქმეს ვიცნობ, საქმე კრიმინალურ დანაშაულს ეხება - გრიგორი კარასინი

რუსეთის საგარეო საქმეთა მინისტრის მოადგილის გრიგორი კარასინის განცხადეით, იგი ქართველი ვიცე-პოლკოვნიკის გია ცერცვაძის საქმეს იცნობს.

მისი თქმით, საქმე ეხება კრიმინალს, რომელიც ცერცვაძემ 2003 წელს რუსეთის ტერიტორიაზე ჩაიდინა.

ამის შესახებ კარასინმა ჟურნალისტებს პრაღაში,ლ აბაშიძე-კარასინის ფორატის შეხვედრის ფარგლებში განაცხადა.

„ცერცვაძის საქმეს ვიცნობ და ამ საკითხს დღეს განვიხილავთ. საქმე კრიმინალურ დანაშაულს ეხება, რომელიც მან რუსეთის ტერიტორიაზე 2003 წელს ჩაიდინა. დოკუმენტაცია გვაქვს. ჩვენ უსაფუძვლოდ ინტერპოლში მოთხოვნას არ ვაგზავნით. დღევანდელ შეხვედრაზე ჩვენ არგუმენტებს გავცვლით, რადგან ეს ჰუმანიტარული საკითხია. ყველა თემა, როგორიცაა ბრალდებები, ძებნა და ასე შემდეგ, ანუ რომლებიც ადამიანებს ეხება ჰუმანიტარულ სფეროს მიეკუთვნება. ჩვენ გაგვაჩნია საკუთარი წყაროები და ვფლობთ ინფორმაციას“,-აღნიშნა რუსმა დიპლომატმა.

მისი თქმით, რუსეთი ქართველ სამხედროებზე არ ნადირობს.

„ასეთი რამ არ ხდება. ჩვენ გამოძიებას ვაწარმოებთ კრიმინალურ საქმეებზე, რომლებიც სამწუხაროდ, რუსეთის, ან საქართველოს ტერიტორიაზეა ჩადენილი. მაგალითისთვის, საქართველოში იმყოფება პიროვნება ლაკაევი,რომელიც აფხაზეთში რუსი დიპლომატისა და მისი მეუღლის მკვლელობაშია ეჭვმიტანილი. ის ახლა პატიმრობაშია და სასჯელს იხდის, მაგრამ, მის საქმეზეც ვილაპარაკებთ დღეს“,-განაცხადა კარასინმა, რომლის თარგმანს რუსთავი2 ავრცელებს.

მონიკა დავლიანიძე