სამართალი

ცენტრ პოინტის საქმის განხილვა ახალ ეტაპზე გადადის

საქალაქო სასამართლოში ცენტრ პოინტის „ბათუმის მაგნოლიის“ ეპიზოდის განხილვა გრძელდება.

დღევანდელ პროცესზე პროკურატურის მიერ წარდგენილ წერილობით მტკიცებულებებს გამოიკვლევენ.
სახელმწიფო ბრალდების თქმით, ეს არის ის დოკუმენტები, რომლებითაც უშუალოდ დასტურდება ბრალდებულების ბრალეულობა.

როგორც საკითხის კომენტირებისას პროკურორმა დავით გუმბერიძემ განაცხადა, აქ იგულისხმება როგორც ფინანსური დოკუმენტაცია, ასევე გაფორმებული ხელშეკრულებები.

„ გამოკვლეული იქნება რევიზიის აქტი, რითაც დასტურდება, რომ მაია რჩეულიშვილი, გუკა რჩეულიშვილი და ირაკლი მინდელის მიერ ხდებოდა აღნიშნული თანხების გატანა და შემდგომ უკვე არამიზნობრივად, პირადი ინტერესებიდან გამომდინარე, ხარჯვა“,-აღნიშნა პროკურორმა.

დღევანდელ პროცესს დაცვის მხარეს არც ერთი შუამდგომლობა არ ექნება.

მაია რჩეულიშვილის ადვოკატის მარინე ცერცვაძის თქმით, პროკურატურამ მოწმეების დაკითხვის ეტაპი დაასრულა და პროცესი ახალ ეტაპზე გადადის.

„ეს არის წერილობითი მტკიცებულებების გამოკვლევის ეტაპი. დავიწყებთ პირველი ტომიდან და განხილული იქნება ყველა წერილობითი მტკიცებულება ცალ-ცალკე. ეს არის ოქმები, აქტები, ხელშეკრულებები და ასე შემდეგ. ყველაფერს გავივლით დეტალურად და შემდეგ უკვე გადაწყვეტს სასამართლო თუ რომელი წერილობითი მტკიცებულება დარჩება საქმეში და რომელი იქნება საქმიდან გამორიცხული“,-აღნიშნა ცერცვაძემ.

რაც შეეხება მაია რჩეულშვილის ჯანმრთელობის მდგომარეობას - იგი კვლავა მძიმეა. ადვოკატები სასჯელაღსრულების დაწესებულებიდან მისი ჯანმრთელბის მდგომარეობის შესახებ ცნობას ელოდებიან, რის შემდეგ კიდევ ერთხელ დააყენებენ შუამდგომლობას რჩეულშვილისთვის აღკვეთის ღონისძიების შეცვლასთან დაკავშირებით.

მონიკა დავლიანიძე