სამართალი

„ცენტრ-პოინტის“ დაზარალებული მენაშენეები ბინებს მაქსიმუმ სამ წელიწადში მიიღებენ - ადვოკატი

სამშენებლო კომპანია „ცენტრ-პოინტის“ საქმის არსებითი განხილვა ე.წ. ბათუმის მაგნოლიის ეპიზოდზე 1-ელი ივნისისთვის გადაიტანეს. სხდომის გადადების შუამდგომლობა დაცვის მხარემ დააყენა. მას ბრალდებაც დათანხმდა იმ განმარტებით, რომ პროკურატურას არ სურს, ხელი შეუშალოს სამმხრივ მოლპარაკებებს დაზარალებულებს, „m2“-სა და „ცენტრ პოინტს“ შორის.

ადვოკატ ბექა ბასილაიას განცხადებით, გადადება ემსახურება სამმხრივი ხელშეკრულების შესრულებას. უფლებადამცველის ინფორმაციით, აღნიშნული ხელშეკრულებით „ცენტრ-პოინტის“ დაზარალებული მენაშენეები ბინებს მაქსიმუმ სამ წელიწადში მიიღებენ.

„ჩვენ ვითხოვთ პროცესის გადადებას, ეს არანაირად არ ემსახურება გაჭიანურებას. აპრილის თვეში გაფორმდა სამმხრივი ხელშეკრულება და კომპანია „m2“-მა აიღო ვალდებულება, წინაპირობების შესრულების შემდეგ დააკმაყოფილოს ყველა მენაშენე, რომელსაც „ცენტრ პოინტი“ ჯგუფის მიერ ასაშენებელ ობიექტებზე უნდა მიეღოთ ფართი. მოლაპარაკებების წარმატებით დასრულების შემდეგ ჩვენ შეგვიძლია ვთქვათ, რომ ყველა ადამიანი, ვინც წლების განმავლობაში ელოდებოდა ბინას, მაქსიმუმ სამ წელიწადში მიიღებს“, - თქვა ადვოკატმა.