პოლიტიკა

წელს პირველ კლასში 16 და 17 სექტემბერს დაბადებულ ბავშვებსაც მიიღებენ

წელს საჯარო სკოლების პირველ კლასში ის ბავშვებიც ჩაირიცხებიან , რომლებსაც 6 წელი 16 და 17 სექტემბერს შეუსრულდებათ. ეს სიახლე „ზოგადი განათლების შესახებ კანონში“ არსებულმა ჩანაწერმა განაპირობა.

კანონში წერია, რომ პირველ კლასში ბავშვები 6 წლის ასაკიდან ირიცხებიან, ხოლო სწავლა 15 სექტემბერს იწყება. ასევე, არსებობს დათქმა, თუ თხუთმეტი სექტემბერი ემთხვევა უქმე ან დასვენების დღეს, სასწავლო პროცესი პირველივე სამუშაო დღეს დაიწყება.

წელს 15 სექტემბერი დასვენების დღეს ემთხვევა. შესაბამისად, სწავლის დაწყების მომენტში 16 და 17 სექტემბერს დაბადებული ბავშვები უკვე 6 წლის ასაკის იქნებიან.

„ვინაიდან 2018 წლის 15 სექტემბერი შაბათ დღეს ემთხვევა, 2018-19 სასწავლო წლისთვის სწავლის დაწყების თარიღად 17 სექტემბერი განისაზღვრება. სკოლაში შემსვლელი მოსწავლე უნდა იყოს 6 წლის, შესაბამისად, ვისაც 16 და 17 სექტემბერს უსრულდება 6 წელი, მას შეუძლია, ჩაირიცხოს ზოგადსაგანმანათლებლო დაწესებულების პირველ კლასში. შესაბამისად, ეს არ შეეხებათ 18 სექტემბერსა და მომდევნო დღეებში დაბადებულ ბავშვებს, რადგან სწავლის დაწყების მომენტში მათი ასაკი 5 წელი იქნება“, –ამბობს განათლებისა და მეცნიერების სამინისტროს ზოგადი განათლების მართვისა და განვითარების დეპარტამენტში არსებული მონიტორინგისა და კოორდინაციის სამმართველოს უფროსი ეკა ხუციშვილი.

წელს სკოლებში პირველკლასელთა შიდა რეგისტრაცია 10 აპრილიდან, ხოლო ონლაინ რეგისტრაცია მაისის დასაწყისიდან დაიწყება.

ცირა გურგენიძე