პოლიტიკა

ტრისტან წითელაშვილის განმარტება აშშ-ის ელჩზე გაკეთებულ განცხადებაზე

საქართველოს თავდაცვის სამინისტროს ყოფილმა თანამშრომელმა, ტრისტან წითელაშვილმა საქართველოში აშშ-ის ელჩის, იან კელიზე გაკეთებულ განცხადებაზე განმარტა გააკეთა. როგორც წითელაშვილმა 1tv.ge-ის განუცხადა, მან იან კელი არა ტერორისტებთან თანამშრომლობაში დაადანაშაულა, არამედ იმაში, რომ პანკისის ხეობაში ყოფნისას კელი შეხვდა პირებს, რომლებიც „ისლამური სახელმწიფოს“ რიგებში იბრძოდნენ.

„მე პირდაპირ თანამშრომლობაზე არ დამიდია ხელი იან კელისთვის, მაგრამ იმ შეხვედრაზე იმყოფებოდნენ ეს ადამიანები. იან კელი მათ ინდივიდუალურად შეხვდა, თუ სხვა დანარჩენ პირებთან ერთად, ეგ მე არ მითქვამს და არ ვადასტურებ. მე ვამბობ, რომ იმ შეხვედრაზე იმყოფებოდნენ ის კონტიგენტი, რომელიც იბრძოდა სირიაში, „ისლამურ სახელმწიფოში“ “, - განაცხადა წითელაშვილმა.

წითელაშვილმა აღნიშნა, რომ თსუ-ში გამართულ შეხვედრაზე არა მარტო დასავლეთის საფრთხეებზე მსჯელობდნენ, არამედ განიხილავდნენ საქართველოში არსებულ სიტუაციასა და რუსეთიდან მიმდინარე საშიშროებაზეც.

მისი თქმით, მედიაში გავრცელებული სამეცნიერო შეხვედრის სათაური სიმართლეს არ შეესაბამება.

შეგახსენებთ, 30 მაისს თბილისის სახელმწიფო უნივერსიტეტში გაიმართა კონფერენცია თემაზე „დასავლური საფრთხეები საქართველოში“, რომლის ერთ-ერთი მონაწილე თავდაცვის სამინისტროს ყოფილი თანამშრომელი ტრისტან წითელაშვილი იყო. საინფორმაციო სააგენტო პატრიოტი tv-ის გავრცელებულ ვიდეოში წითელაშვილმა ამერიკის ელჩი, იან კელი დაადანაშაულა, რომ ის „საქართველოს შიდა საქმეებში“ ერევა და პანკისის ხეობაში, სირიიდან დაბრუნებულ ისლამური სახელმწიფოს ტერორისტებს შეხვდა.

სამეცნიერო შეხვედრას გამოეხმაურა თსუ-ის რექტორის მოადგილე მიხეილ ჩოხელი. მან განაცხადა, რომ შეხვედრის ორგანიზატორებმა თემა ისე შეცვალეს, რომ თსუ-ის ხელმძღვანელობა საქმის კურსში არ ჩააყენეს.

ჩოხელმა აღნიშნა, რომ უნივერსიტეტი შეხვედრაზე გაკეთებულ ანტიდასავლურ განაცხადებებს ემიჯნება.

ანა მებურიშვილი