პოლიტიკა

ტრამპი ლტოლვილების ჩამოსვლაზე შეზღუდვების დაწესებას გეგმავს - როიტერი

აშშ-ის პრეზიდენტმა დონალდ ტრამპმა, შეიძლება, ხელი მოაწეროს ბრძანებულებას, რომელიც მაჰმადიანური ქვეყნებიდან მიგრანტებისა და ლტოლვილების ჩამოსვლაზე შეზღუდვებს აწესებს. ინფორმაციას როიტერი ავრცელებს, იმიგრაციის საკითხებზე რამდენიმე მომუშავე ექსპერტზე დაყრდნობით.

ანონიმურ წყაროების ცნობით, შეზღუდვები ეხება სირიის, ერაყის, ირანის, ლიბიის, სომალის, სუდანისა და იემენის მოქალაქეებისთვის ვიზების გაცემის შეზღუდვას, აგრეთვე ტრამპი გეგმავს აშშ-ში თავშესაფრის მიღებაზე მონიტორინგის ჩატარებას.

როიტერი აღნიშნავს, რომ პრეზიდენტის უფლებამოსილება შეიძლება შეიზღუდოს კონგრესის მიერ, მაგალითად, თუკი საკანონმდებლო ორგანო თანხების გამოყოფაზე უარს იტყვის. ტრამპის გადაწყვეტილება შეიძლება სასამართლომაც შეაჩეროს, თუკი დოკუმენტს არაკონსტიტუციურად ჩათვლის.

დონალდ ტრამპმა თავის ტვიტერზე დაწერა, რომ „დღეს იქნება მნიშვნელოვანი დღე ნაციონალური უსაფრთხოებისთვის. გარდა ამისა ჩვენ კედელს ავაშენებთ“. მედიაში ვარაუდობენ, რომ აშშ-ის პრეზიდენტმა მექსიკის საზღვართან „დიდი კედლის“ მშენებლობის პროექტი იგულისხმა.

ანა მებურიშვილი