პოლიტიკა

ტრადიციულად ფინანსური წნეხია, კვლავ აკრძალულია ჩვენი დაფინანსება - შალვა ნათელაშვილი

ლეიბორისტული პარტიის საპრეზიდენტო კანდიდატმა შალვა ნათელაშვილმა მისი დაფინანსების კუთხით შექმნილ პრობლემაზე ისაუბრა. ნათელაშვილის თქმით, მის პარტიას დიდი მოცულობის საბანკო კრედიტის აღება არ შეუძლია მაშინ, როცა „ქართული ოცნების“ მიერ მხარდაჭერილ სალომე ზურაბიშვილს მსგავსი პრობლემა არ შექმნია.

„ერთადერთი იმედი ივანიშვილის რეჟიმისა, რომ მოხდეს ჩემი ჩაბლოკვა 28 ოქტომბრის არჩევნებში, ტრადიციულად ფინანსური წნეხია, კვლავ აკრძალულია ჩვენი დაფინანსება, საარჩევნო კრედიტის გაცემა და, რა თქმა უნდა, თოვლის ფანტელებივით ეყრება თავზე პუტინის წარმოგზავნილ ზურაბიშვილს ჩვენი ხალხისგან აწაპნილი მილიონები.

მე დღეს მაინც საცდელად გავაგზავნე ყველა ბიზნესსეგმენტში, ბანკში წერილი იმის შეხსენებით, რომ სწორედ მათი დაღუპულია საქართველო, სწორედ მათი ყაჩაღური ფინანსების შედეგად მიდიოდნენ და მოდიოდნენ ხელისუფლებები, რომლებიც მათვე ძარცვავდნენ და სანამ ასე გააგრძელებენ, ჩვენი ქვეყნის ფეხზე დადგომა არ იქნება“,-განაცხადა ნათელაშვილმა.