პოლიტიკა

ტრადიცია გრძელდება, როცა საარჩევნოდ მმართველი გუნდი ყველაზე მეტ შემოწირულობას იღებს - გიგი ჩიხრაძე

არასამთავრობო ორგანიზაცია „საერთაშორისო გამჭვირვალობა - საქართველოს“ უფროსი იურისტის, გიგი ჩიხრაძის შეფასებით, დიდი სხვაობა „ქართული ოცნებისა“ და ოპოზიციური პარტიების მიერ მიღებულ შემოწირულობებს შორის წინასაარჩევნო პერიოდის ტენდენციის ნაწილია, როცა მმართველ პარტიას ყველაზე მეტ ფულს ურიცხავენ.

„ტრადიცია გრძელდება, როდესაც საარჩევნოდ მმართველი გუნდი ყველაზე მეტი თანხის მობილიზებას ახდენს. ეს ტენდენცია ამ არჩევნების წინაც არ დარღვეულა. ძალიან დიდია სხვაობა მმართველი გუნდისა და სხვა პარტიების მიერ მობილიზებულ თანხებს შორის. მიზეზებზე საუბარი ძალიან რთულია, რადგან შეიძლება იყოს, როგორც სამართლებრივი, ასევე არასამართლებრივი საკითხები. ჩვენ შეგვიძლია მხოლოდ ფაქტი შევაფასოთ და ფაქტია, რომ ამ მომენტისთვის 7 მილიონ ლარზე მეტი შემოწირულობა მიღებული აქვს „ქართულ ოცნებას“, თუმცა დანარჩენ პარტიებს ნახევარი მილიონიც არა. დარღვევებზე ამ ეტაპზე გაგვიჭირდება საუბარი. ჩვენ, „საერთაშორისო გამჭვირვალობაც“ ვახორციელებთ მონიტორინგს და შემოსავალსა და გაღებულ შემოწირულებას შორის თუ საეჭვო სხვაობას აღმოვაჩენთ, ამაზე გვექნება რეაგირება. ჩვენი კვლევა პროცესშია და კონკრეტულად ამ მომენტისთვის არ შემიძლია ვთქვა, დაფიქსირდა თუ არა დარღვევა“,- განაცხადა ჩიხრაძემ.

შეგახსენებთ, 2017 წლის 1-ელი ივლისიდან 12 სექტემბრის მონაკვეთში ყველაზე მეტი შემოწირულობა - 7.343.993 ლარი „ქართულმა ოცნებამ“ მიიღო.

სახელმწიფო აუდიტის სამსახურის ინფორმაციით, შემოწირულობების მიხედვით მეორე ადგილს „ევროპული საქართველო“ იკავებს 323.675.45 ლარით, მას მიჰყვებიან „პატრიოტთა ალიანსი“ 15.600 ლარითა და „გირჩი“ 15.300 ლარით, ხუთეულს კი „ეროვნულ-დემოკრატიული პარტია“ ხურავს 12.204 ლარით.

გარდა ამისა, „ეროვნულმა ფორუმმა“ 9.215 ლარი მიიღო, „ნაციონალურმა მოძრაობამ“ – 5.432 ლარი, „დემოკრატიული მოძრაობა - ერთიანმა საქართველომ“ - 900 ლარი, საქართველოს ერთიანმა კომუნისტურმა პარტიამ - 434 ლარი, პარტიამ „საქართველოს მშვიდობისათვის“ – 200 ლარი, ხოლო ყველაზე ცოტა შემოწირულობა „რესპუბლიკური პარტიის“ ანგარიშზეა– 40 ლარი.

აღნიშნულ პერიოდში პარტიების მიერ მიღებულმა შემოწირულობებმა ჯამურად 7.726.993.45 ლარი შეადგინა.

ანა მებურიშვილი