პოლიტიკა

თქვენ ქმნით სამარცხვინო ფურცელს საქართველოს ისტორიაში - ევროპულმა საქართველომ პარლამენტის რიგგარეშე სხდომა დატოვა

„ევროპულმა საქართველომ“ პროტესტის ნიშნად პარლამენტის რიგგარეშე სხდომა დატოვა. ამის შესახებ პარტიის წევრმა ელენე ხოშტარიამ განაცხადა.

ხოშტარიამ სახელისუფლებო გუნდს ერთპარტიული კონსტიტუციის მიღებაში დაადანაშაულა. დეპუტატის თქმით, საპარლამენტო უმრავლესობამ არ გამოიყენა არცერთი შანსი ვითარების გაუმჯობესებისთვის.

„ჩვენც დაგვიშვია შეცდომები, მაგრამ დგება კრიტიკული მომენტები, როცა ვეხებით ქვეყნის განვითარების ფუნდამენტურ საკითხებს. ესაა არჩევნები და საშუალება, რომ მშვიდობიანი არჩევნების გზით იცვლებოდეს ხელისუფლებები და ესაა კონსტიტუცია.

კონსტიტუცია არაა თქვენი პარტიის ცხოვრების წესი და მომავლის დოკუმენტი, კონსტიტუცია არის ქვეყნის განვითარების ფუნდამენტური თამაშის წესი. აქ თქვენ არ გაქვთ უფლება, აიღოთ კონსტიტუცია და თქვენს თავზე მოარგოთ . ყოველი თქვენგანი სათითაოდ ხართ პასუხისმგებელი ქვეყნის წინაშე, რომ თქვენ აზიანებთ ქვეყანას. თქვენ შემოგვთავაზეთ ამ ჩიხიდან გამოსვლის ბევრი შესაძლებლობა, რადიკალური პოზიციის მქონე ოპოზიციური პარტიები შევჯერდით, კონსესუსი ვიპოვეთ, იმიტომ რომ ეს ქვეყნისთვის საჭირო იყო. ჩვენ შემოგთავაზეთ პლებისციტი, რომ თუ ვერ შევჯერდებით პოლიტიკურ პროცესში, მოდით, ვკითხოთ ხალხს. თქვენ ვენეციის კომისიამ შემოგთავაზათ უამრავი მნიშვნელოვანი შენიშვნა, პრეზიდენტმა მოახერხა და განსხვავებულ პოლიტიკურ პარტიებთან ერთად შემოგთავაზათ გამოსავალი. ეს ყველაფერი არ გაინტერესებთ. ერთადერთი გაინტერესებთ, რომ ჩაებღაუჭოთ ხელისუფლებას, რაც არ გამოგივათ, ჩამობღაუჭება სწორედ თქვენს სისუსტეზე მეტყველებს. მოკლედ გეტყვით, თქვენ ქმნით სამარცხვინო ფურცელს საქართველოს ისტორიაში და თქვენ იმსახურებთ, რომ ამ დროს დარჩეთ ამ ფარსში მარტო. „ევროპული საქართველო“ ტოვებს ამ სხდომას“, -თქვა ხოშტარიამ.

სხდომა 2 საათზე დაიწყო. დღეს მესამე მოსმენით კენჭი უნდა უყარონ საკონსტოტუციო ცვლილებათა კანონპროექტს.

ანა მებურიშვილი