პოლიტიკა

თქვენ მიერ პარლამენტის ქუთაისიდან თბილისში გადატანა არის წარსულისკენ გადადგმული ნაბიჯი, ბერია-სტალინის არქიტექტურაში დაბრუნება - სერგო რატიანი

„თქვენ მიერ პარლამენტის ქუთაისიდან თბილისში გადატანა არის ბერია-სტალინის არქიტექტურაში დაბრუნება“, - ამის შესახებ ფრაქცია „ევროპული საქართველოს“ წევრმა სერგო რატიანმა პარლამენტის რიგგარეშე პლენარულ სესიაზე განაცხადა, რითიც გამოეხმაურა ქუთაისში ბოლო სხდომის ჩატარებას.

დეპუტატის განცხადებით, პარლამენტის ქუთაისიდან თბილისში გადატანა წარსულისკენ გადადგმული ნაბიჯია.

„6 წლის განმავლობაში ვიცავდით იმ პრინციპს და იმ ჩანაწერს, რომ ქუთაისი ყოფილიყო საპარლამენტო დედაქალაქი. სწორედ ეს იყო განახლების, მომავლის, თანამედროვე საქართველოს სიმბოლო. თქვენ მიერ პარლამენტის ქუთაისიდან თბილისში გადატანა, ვფიქრობ, არის უკან წარსულისკენ გადადგმული ნაბიჯი. ეს არის ბერია-სტალინის არქიტექტურაში დაბრუნება. ეს არის იმ რეალობაში დაბრუნება, როდესაც ელიტა ცხოვრობს ერთ ქალაქში, იქვე უნდა გადაირბინოს და იქვე მოაყომაროს მთელი ქვეყნის ბედი. ასევე, ეს არის სიმბოლო, როდესაც გვაქვს, მაგალითად, ხუთოთახიან ბინა, გვინდა, რომ შევიყუჟოთ და ერთ ოთახში ვიცხოვროთ. ამიტომ ჩემთვის მძიმეა ის, რომ ეს არის დროებით გამომშვიდობება მომავლის საქართველოსთან“, - განაცხადა რატიანმა.