პოლიტიკა

თქვენ აპირებთ სამოქალაქო ომის დაწყებას, თუ ხალხი უარს გეტყვით, ამას ნიშნავდა თქვენი კოლეგის განცხადება - გიგა ბოკერია უმრავლესობას

პარლამენტში საპრეზიდენტო არჩევნების პირველი ტურის შედეგების განხილვა ხმაურისა და დაპირისპირების ფონზე მიმდინარეობდა. საპარლამენტო უმრავლესობის წევრები ამტკიცებდნენ, რო მეორე ტურში მმართველი პარტიის მიერ მხარდაჭერილი სალომე ზურაბიშვილი დამაჯერებლად გაიმარჯვებს. ოპოზიცია თავის მხრივ, ამბობდა, რომ ხელისუფლება ცდილობს, საზოგადოებაში ძალადობრივი ფონი გააღვივოს.

ოპოზიციონერმა დეპუტატმა, გიგა ბოკერიამ საპარლამენტო უმრავლესობის წევრებს ახალქალაქში გრიგოლ ვაშაძის შტაბზე თავდასხმაზე რეაგირება მოსთხოვა. ბოკერიას თქმით, უმრავლესობა აღნიშნულ ინციდენტს არ გმობს, ასევე არ ემიჯნება თავისი თანაგუნდელის, გედევან ფოფხაძის განცხადებას შესაძლო სამოქალაქო დაპირისპირებასთან დაკავშირებით. ბოკერიას შეფასებით, ეს იმას ნიშნავს, რომ მმართველი გუნდი ორივე საკითხში ერთიანია.

„გრიგოლ ვაშაძის ოფისზე ხელკეტებით თავდასხმის ფაქტის დაგმობის არცერთი სიტყვა აქ არ მომისმენია. არცერთი სიტყვა არ მომისმენია იმ სახიფათო და სამარცხვინო განცხადებისგან დისტანცირების ან დაგმობის, რომ თურმე მთავრობის მარცხი არჩევნებში ნიშნავს სამოქალაქო ომის დაწყებას, ანუ თქვენ აპირებთ სამოქალაქო ომის დაწყებას, თუ ხალხი უარს გეტყვით, ამას ნიშნავდა თქვენი კოლეგის განცხადება და თქვენი დუმილი აქ ამ ორ საკითხზე, არის შეერთება ამ განცხადების“, -თქვა ბოკერიამ.