პოლიტიკა

თითოეული უბანი ჩვენ გვიღირს იმად, რომ დავხარჯოთ 500-600 ლარი, რომ არ მოხდეს არჩევნების ტოტალური გაყალბება - გიორგი ვაშაძის პასუხი ცესკოს

„ახალი საქართველოს“ ლიდერის გიორგი ვაშაძის განცხადებით, ონლაინ რეჟიმში საარჩევნო ბიულეტენების დათვლის საკითხს ყველა ოპოზიციური პარტია უჭერს მხარს.

ამის შესახებ ვაშაძემ ბრიფინგზე განაცხადა.

მისი თქმით, საკითხთან დაკავშირებით ცესკო-ს მხრიდან გაკეთებული საპასუხო განცხადება - არაკონსტრუქციულია.

ცესკოს განმარტებით, არ არსებობს არც საკანონმდებლო და არც ტექნიკური მზაობა ბიულეტენების ონლაინ რეჟიმში დასათვლელად.

„ჩვენმა განცხადებამ, როგორც ჩანს, ძალიან რთულ მდგომარეოაბში ჩააგდო ცენტრალური საარცევნო კომისია. მათ თვითონაც იცოდნენ, რომ ამ ტექნოლოგიის გამოყენების შემთხვევაში „მწვანე უბნების“ პროექტი ჩაუვარდებათ.

ჩვენ გვქონდა ყველა ოპოზიციურ პარტიასთან საუბარი და ყველა ცალსახად მხარს უჭერს ამ ინიციატივას. რაც შეეხება ტექნიკური შესაძლებლობებს, პირდაპირ გეუბნებით, ჩემი შვილი მიხეილ ვაშაძე რომელიც ახლა შედის სკოლაში, ისიც კი შეძლებს ამის გაკეთებას, რადგან მხოლოდ ერთ ღილაკზეა თითის დაჭერა საჭირო.

რაც ყველაზე მნიშვნელოვანია, ამ გზით მოხდება ფინანსური რესურსების დაზოგვა. გამოცდების ეროვნულ ცენტრში არსებობს ეს ტექნიკური საშუალება და მეორეც, თითოეული უბანი ჩვენ გვიღირს იმად, რომ დავხარჯოთ 500-600 ლარი, რომ არ მოხდეს არჩევნების ტოტალური გაყალბება“,- განაცხადა ვაშაძემ.

პარტიის ლიდერი ცენტრალურ საარჩევნო კომისიას მოუწოდებს იყოს კონსტრუქციული და თავი შეიკაონ პოლიტიკურ განცხადებების გაკეთებისგან.

მონიკა დავლიანიძე