პოლიტიკა

თინათინ ხიდაშელი მედიას ვანო ჩხარტიშვილის შესაძლო კორუფციული საქმიანობის გამოძიებისკენ მოუწოდებს

თავდაცვის ყოფილმა მინისტრმა - თინათინა ხიდაშელმა მედიის წარმომადგენლებს ფოთის თავისუფალ ინდუსტრიულ ზონასთან დაკავშირებით ჟურნალისტური გამოძიების ჩატარებისკენ მოუწოდა.

მისი თქმით, აღნიშნულ საქმეში ბიზნესმენ ვანო ჩხარტიშვილის კორუფციული საქმიანობა იკვეთება, რომელიც „ომეგას“ საქმეზე მეტად რეზონანსული შეიძლება აღმოჩნდეს. ყოფილი მინისტრის თქმით, ის ჯერჯერობით მოკვლევის პროცესშია და მეტ დეტალზე ვერ საუბრობს.

„ფოთის თავისუფალ ინდუსტრიულ ზონაში, ბატონ ჩხარტიშვილის ინტერესებთან დაკავშირებით თუ ვინმე ჩაატარებს ჟურნალისტურ გამოძიებას, ვფიქრობ, იმაზე მეტ საინტერესო ფაქტს აღმოაჩენს კორუფციასთან დაკავშირებით, ვიდრე ისაა, რაზეც ახლა ვსაუბრობთ. ჯერ არ ვარ მზად, რომ ამაზე კონკრეტულად ვისაუბროთ, თუმცა ეს საქმე მრავალწლიანია, იმდროინდელი, ჩვენც რომ ხელისუფლებაში ვიყავით, მაგრამ ამის შესახებ არაფერი არ ვიცოდით“, - განაცხადა ხიდაშლმა „პალიტრანიუსის“ გადაცემაში „360 გრადუსში".