პოლიტიკა

თემირლან მაჩალიკაშვილს „ოცნებამ“ ოცნება წაართვა - თემირლან მაჩალიკაშვილის ბებია

პანკისის ხეობაში ჩატარებული სპეცოპერაციის დროს მოკლული თემირლან მაჩალიკაშვილის ბებიამ - ელენე მაჩალიკაშვილმა საქართველოს მოსახლეობას მიმართა, შეცვალოს მთავრობა.

მისივე თქმით, სუს-ის უფროსის ყოფილი მოადგილის, სოსო გოგაშვილის დავალებით, ის სცემეს.

„მე ვარ ის ბებია, რომელსაც სოსო გოგაშვილის დავალებით გვერდები ჩაულურჯეს, რომელიც სოსო გოგაშვილის დაკვეთით მძევლად აიყვანეს.

შუბლგახვრეტილი, ჩემი პატარა, სანთელივით სუფთა თემირლანი მკვდარი გაიტაცეთ და გაიყვანეთ. გამოდი სოსო გოგაშვილო! არ გყოფნის ვაჟკაცობა! კაცობა არ გაქვს, აღიარო შენი დანაშაული. გააგებინე ხალხს, რომ უდანაშაულო ჩემი შვილიშვილი მომიკალი და მწოლიარეს შუბლი გაუხვრიტე ლოგინში.
ქართველო ხალხო, გეხვეწებით, ჩამოვაშოროთ ეს მთავრობა, ეს უვარგისი მთავრობა, რომელიც სისხლით შემოვიდა. თემირლან მაჩალიკაშვილს „ოცნებამ“ ოცნება წაართვა“, – განაცხადა თემირლან მაჩალიკაშვილის ბებიამ „ქართული ოცნების“ ოფისთან.

შვილმოკლული მამები და მათი მხარდამჭერები „ქართული ოცნების“ ოფისთან აქციას მართავენ. ისინი სოსო გოგაშვილის დასჯას ითხოვენ, რადგან მათი თქმით, სწორედ გოგაშვილი ხელმძღვანელობდა სპეცოპერაციას, რომელიც პანკისში გასულ წელს ჩატარდა და რომელსაც 19 წლის თემირლან მაჩალიკაშვილის სიცოცხლე ემსხვერპლა.

მმართველი პარტიის ოფისთან სამართალდამცავები არიან მობილიზებულები.