პოლიტიკა

ტელეკომპანია „იბერიაზე“ საუბარი არ ყოფილა - ვანო ჩხარტიშვილის ადვოკატი

ბიზნესმენ ვანო ჩხარტიშვილის ადვოკატმა ზაზა ხატიაშვილმა „იბერია ტვ“-სა და „ომეგა ჯგუფის“ შესახებ გავრცელებულ ჩანაწერებზე საუბრისას განაცხადა, რომ მის კლიენტს ამ პროცესებთან კავშირი არ აქვს.

ადვოკატის განმარტებით, ვანო ჩხარტიშვილს, ზაზა ოქუაშვილსა და ირაკლი ჩუბინიშვილს შორის შეხვედრა ნამდვილად შედგა, თუმცა, მისი მტკიცებით, ეს შეხვედრა 2017 წელს გაიმართა და მასზე ტელეკომპანია „იბერიას“ შესახებ საუბარი არ ყოფილა.

რაც შეეხება ვიდეოჩანაწერში ნაჩვენებ სქემას, ხატიაშვილის თქმით, ეს გეგმა „ომეგა ჯგუფის“ დიდი ვალის გამო ჩაიშალა, რადგან კომპანია მის გადახდას ვერ ახერხებდა.

„ეს შეხვედრა მართლაც შედგა 2017 წელს. შეხვედრა ეხებოდა ბიზნესგარემოდან გამომდინარე ორი ყველაზე მსხვილი ქართული საწარმოს სავარაუდო ან შესაძლო გაერთიანებას. შეხვედრის მიზანი იყო ქართული საწარმოების გადარჩენა იმ ფინანსური კრიზისისაგან, რომელიც გამოიწვია იმ დროისათვის არცთუ ისე სახარბიელო მდგომარეობამ. არანაირი ჩანაწერი არ შეიძლება არსებობდეს, რომ იყო რაიმე საუბარი ტელეკომპანია „იბერიასთან“ მიმართებაში. თხოვნა მექნება, თუ შეიძლება, ჩემს კლიენტს ვანო ჩხარტიშვილს ამ პროცესთან ნუ დააკავშირებთ“, -თქვა ადვოკატმა.